Fransada hökumət qənaət tədbirləri hesabına ictimai infrastrukturu modernləşdirməyi hədəfləyir
Paris, 29 iyun, AZƏRTAC
Fransa hökuməti iyulun 7-də dövlət maliyyəsinin vəziyyətini qiymətləndirmək üçün Maliyyə Xəbərdarlıq Komitəsinin iclasını keçirəcək.
AZƏRTAC xəbər verir ki, iclasın məqsədi 2026-cı ilin ilk yarısında büdcə göstəricilərini təhlil etmək və artan iqtisadi çətinliklər fonunda yeni qənaət tədbirlərini müəyyənləşdirməkdir.
Dövlət Hesabları üzrə nazir David Amiel bildirib ki, ilin əvvəlindən Fransa iqtisadiyyatı bir sıra ciddi sarsıntılarla üzləşib. Onun sözlərinə görə, iqtisadi artımın zəifləməsi, Hörmüz boğazındakı gərginlik və son günlər ölkədə qeydə alınan iki güclü istilik dalğası dövlət maliyyəsinə əlavə təzyiq yaradıb.
Hökumətin iyulun 7-də keçiriləcək iclasdan sonra yeni qənaət tədbirlərini açıqlayacağı gözlənilir. Xatırladaq ki, aprel ayında artıq 6 milyard avroluq qənaət planı təqdim edilmişdi.
Ölkənin Hesablama Palatasının son hesabatına əsasən, Fransanın dövlət borcu ümumi daxili məhsulun 117,5 faizinə çatıb və Fransa Avrozonada borc yükü pandemiya dövrünün pik səviyyəsini aşan yeganə ölkədir. Nazir vurğulayıb ki, dövlət borcunun xidmət xərcləri artıq təhsil və müdafiə büdcələrini geridə qoyub.
Hökumət qənaət tədbirləri hesabına iqlim dəyişikliyinə uyğunlaşma və ictimai infrastrukturun modernləşdirilməsi kimi prioritet investisiyalar üçün əlavə maliyyə imkanları yaratmağı hədəfləyir.
Bölmənin digər xəbərləri
