Fransanın kəşfiyyat orqanları gözlənilən etiraz aksiyaları ilə bağlı xəbərdarlıq yayıb
Paris, 4 sentyabr, AZƏRTAC
Fransada sentyabrın 10-na planlaşdırılan “Hər şeyi bloklayaq” adlı genişmiqyaslı vətəndaş təşəbbüsü bu ölkənin kəşfiyyat orqanlarının ciddi narahatlığına səbəb olub. Fransa mətbuatında yayımlanan altı səhifəlik kəşfiyyat sənədində iqtisadiyyatın strateji sahələrinə qarşı mümkün zorakı hərəkətlər və sabotaj aktları ilə bağlı xəbərdarlıqlar yer alıb.
AZƏRTAC xəbər verir ki, Paris polis prefekturasının kəşfiyyat idarəsi və ərazi kəşfiyyat xidməti tərəfindən hazırlanan bu sənəddə sentyabrın 1-də artıq sosial şəbəkələrdə və şifrələnmiş qruplarda ciddi fəallığın müşahidə olunduğu qeyd edilib. Bildirilib ki, bu fəallıq artıq real fəaliyyətlərə çevrilməkdədir. Müxtəlif bölgələrdə hazırlıq toplantıları olub və sentyabrın 10-da keçiriləcək aksiyanın “Sarı jiletlilər” hərəkatının davamı kimi daha geniş yayılması ehtimalı yüksəkdir.
Kəşfiyyat orqanlarının məlumatına əsasən, təxminən 100 min insanın ölkə üzrə aksiyalara qatılması ehtimal edilir. Onların arasında solçu siyasi fəallar, sosial birliklər, həmkarlar ittifaqları və fələstinpərəst humanitar qruplar yer alır. Planlaşdırılan fəaliyyətlər arasında nəqliyyat və sənaye mərkəzlərinin bloklanması, hökumət binalarının qarşısında mitinqlər, strateji infrastruktura qarşı sabotaj aktları ola bilər. Aksiyaçıların əsas hədəfinin isə iqtisadi strukturların olacağı diqqətə çatdırılıb.
Sentyabrın 10-dan sonra isə ayın 18-də həmkarlar ittifaqları təşkilatlarının aksiyası nəzərdə tutulub. Artıq bununla bağlı tətil çağırışları yayılıb. Kəşfiyyat xidmətləri bu aksiyanın “partlayıcı potensiala” malik olduğunu bildirib və bu dəfə əlavə xəbərdarlıq sənədinə ehtiyac olmadığını vurğulayıb.
Kəşfiyyat sənədində göstərilib ki, Fransa hökuməti və hüquq-mühafizə orqanları bu çağırışlara qarşı hazırlıqlı olmalı, ictimai asayişin pozulmasının qarşısını almaq üçün tədbirlər görməlidir.
Bölmənin digər xəbərləri
