Fransanın mərhum Prezidenti Jak Şirakla vida mərasimi keçirilib
Bakı, 30 sentyabr, AZƏRTAC
Parisin Sen-Syulpis kilsəsində dünyanın 30 ölkəsinin dövlət başçıları, habelə siyasətçilərin iştirakı ilə Fransanın mərhum Prezidenti Jak Şirakla vida mərasimi keçirilib. AZƏRTAC AFP agentliyinə istinadla xəbər verir ki, mərasimdə Rusiya Prezidenti Vladimir Putin, İtaliya Prezidenti Serco Mattarella, Almaniya Prezidenti Frank-Valter Ştaynmayer, Avropa Komissiyasının rəhbəri Jan-Klod Yunker, Belçikanın Baş Naziri Şarl Mişel, Livanın Baş Naziri Saad Hariri, Gürcüstan Prezidenti Salome Zurabişvili, Macarıstan hökumətinin rəhbəri Viktor Orban və başqaları iştirak ediblər. Mərhumun xanımı Betnadett xəstə olduğu üçün kilsəyə gələ bilməyib.
Jak Şirakın ailə üzvləri - qızı Klod və nəvəsi Martenin iştirak etdiyi vida mərasiminə Fransa Prezidenti Emmanuel Makron rəhbərlik edib. Beşinci respublikanın sabiq prezidentləri Nikola Sarkozi, Fransua Olland, Valeri Jiskar d”Esten də mərasimin iştirakçıları arasında olublar.
Sabiq Prezident Parisin Monparnas qəbiristanlığında dəfn ediləcək.
Bölmənin digər xəbərləri
