Fransanın öz idmançılarına hicabı qadağan etməsi etirazlara səbəb olub
Bakı, 6 oktyabr, AZƏRTAC
Bir əsrlik fasilədən sonra gələn il ilk Olimpiya Oyunlarına ev sahibliyi etməyə hazırlaşan Fransanın öz idmançılarına hicab taxmağı qadağan etməsi ərəb ölkələrində və beynəlxalq aləmdə kəskin etirazlara səbəb olub.
AZƏRTAC xarici KİV-ə istinadla xəbər verir ki, 67 milyon əhalisinin təxminən 10 faizini müsəlmanlar təşkil edən Fransa Olimpiya məşəlinin yandırılacağı 26 iyul 2024-cü il tarixindən etibarən idmançılarına hicabı qadağan edən son qərarı ilə yenidən diqqətləri üzərinə çəkib.
Fransanın idman naziri Ameli Oudea-Kastera bir telekanalın efirində bildirib ki, Fransa nümayəndə heyətinin tərkibində olan idmançılar Olimpiya Oyunları zamanı hicab geyinə bilməyəcək. Onun bu bəyanatı kəskin etirazlara səbəb olub və insan haqlarının pozulması ilə bağlı müzakirələri yenidən qızışdırıb.
İslam Əməkdaşlıq Təşkilatına (İƏT) üzv ölkələrin daxil olduğu İslam Həmrəyliyi İdman Federasiyası oktyabrın 2-də Fransa hökumətinin qarşıdan gələn Paris Olimpiadasında fransız idmançıların hicab taxmasının qarşısının alınması ilə bağlı son qərarı ilə bağlı dərin narahatlığını ifadə edib. Federasiya öz bəyanatında vurğulayıb ki, “bu qadağa Olimpiya Oyunlarının müdafiə etdiyi bərabərlik, inklüzivlik və mədəni müxtəlifliyə hörmət prinsiplərinə ziddir”.
Fransız hökumətinin bu qərarı Beynəlxalq Olimpiya Komitəsinin (BOK) sentyabrın 29-da “hicab və ya hər hansı digər dini və ya mədəni geyimə heç bir məhdudiyyət olmadığını” bildirməsindən sonra verilib. BOK-un mövqeyi Mərakeşin keçmiş Baş naziri Saad Eddine el Osmani tərəfindən yüksək qiymətləndirilib.
Birləşmiş Millətlər Təşkilatının İnsan Hüquqları Bürosunun sözçüsü Marta Hurtado verdiyi açıqlamada bildirib ki, "heç kim qadına nə geyinməli olduğunu söyləyə bilməz. Bir qrupa qarşı bu ayrı-seçkilik metodları zərərli nəticələrə səbəb ola bilər".
Beynəlxalq Müsəlman Alimləri Birliyinin baş katibi Əli Əl-Qaradaqi Fransanın mövqeyini dolayı tənqid edərək deyib ki, “Britaniyanın ən böyük şəhərləri öz küçələrində hicablı qadının heykəlini qoyublar... Ağıllı insanlar adi həqiqətləri başa düşürlər və öz cəmiyyətinin məxfiliyinə hörmət etməyə çalışırlar”.
İspaniya İslam Dini Qurumları Federasiyasının Mərakeşin Seuta şəhərindəki nümayəndə heyətinin baş katibi İdris Əl-Vahabi Fransanın bu cür qərarlarının “ümumilikdə müsəlmanları və xüsusilə də mərakeşliləri təxribata yönəltmək məqsədi daşıdığını” qeyd edərək vurğulayıb ki, mərakeşlilər Fransanın ən böyük müsəlman qrupunu təmsil edir. O əlavə edib: “Biz bu cür qərarlara qarşı çıxmaq üçün Federasiya və Fransada mövcud olan İslam qurumları ilə koordinasiya şəraitində işləyirik”.
Fransanın bu qərarı “X” sosial media platformasında da tənqid və qınaqlara səbəb olub.
Yazıçı və siyasi analitik Yaser Əl-Zaatara bu qərarı hicaba qarşı “isteriya” və “müsəlmanlara qarşı əzələ nümayişi” kimi qiymətləndirib. Fransa prezidenti Emmanuel Makronu tənqid edən Əl-Zaatara BOK-un mövqeyini tərifləyib və bunu “Makron və Fransanın İslamofobiya bandasına zərbə” adlandırıb.
Tanınmış ictimai xadim Möhsün Əl-Obaidi Əl-Saffar isə öz səhifəsində yazıb: “Emmanuel Makron Fransada hicabın dövlətin dünyəviliyi ilə ziddiyyət təşkil etdiyini bəhanə edərək, onunla mübarizə aparır. Bununla belə, onun Roma Papasının keçirdiyi mərasimə qatılmaqda heç bir problemi yoxdur, axı, orada da qadınlar başıörtülü olur. Makronun problemi dinlə deyil, konkret olaraq İslamla bağlıdır”.
Başqa ictimai xadim Abdel Hamid Al-Linqavi yazıb: “Fransa sübut etdi ki, irqçi ölkədir və Olimpiya Oyunlarına ev sahibliyi etməyə layiq deyil.
Fransalı alim Əbu Əbdül Rəhman Əl-Manea Fransanın mövqeyini Əfqanıstanın “Taliban” hərəkatı ilə müqayisə edib. O yazıb: “Fransa və bəzi Avropa ölkələri müsəlman qadınlar üçün hicab və baş örtüyünü qadağan edir, “Taliban” isə qadınları hicab taxmağa məcbur edir və üzləri açıq olan əcnəbi qadınların turist səyahəti etməsinə mane olur”.
Bölmənin digər xəbərləri
