Fransızlar nə düşünür: Sahibkar prezident ola bilərmi?
Paris, 3 fevral, AZƏRTAC
Fransada siyasi müzakirələr getdikcə daha çox sahibkarlar, şirkət rəhbərləri və işəgötürən təşkilatları ətrafında cəmlənir. Ardıcıl hökumətlərə qarşı artan inamsızlıq fonunda fransızların əhəmiyyətli bir hissəsi hesab edir ki, patron - yəni biznes rəhbəri - ölkəni daha yaxşı idarə edə bilər. Sorğuya əsasən, respondentlərin 58 faizi sahibkarın respublika prezidenti kimi daha uğurlu ola biləcəyini düşünür.
AZƏRTAC xəbər verir ki, Fransada alıcılıq qabiliyyəti, məşğulluq və iqtisadi artım kimi mövzular seçicilər üçün əsas prioritetlər olaraq qalır. 2027-ci il prezident seçkiləri yaxınlaşdıqca, Emmanuel Makrondan sonra Yelisey sarayında bir sahibkarı görmək istəyənlərin sayı diqqət çəkir. Fransanın siyasi sorğu və marketinq araşdırmaları şirkəti “OpinionWay” tərəfindən Siyasi İnnovasiya Fondu (Fondapol) və “La Tribune dimanche” qəzeti üçün aparılan sorğu göstərir ki, fransızların 58 faizi sahibkarın yaxşı prezident ola biləcəyinə inanır.
Bu yanaşmanın arxasında güclü iqtisadi arqumentlər dayanır. Respondentlərin 74 faizi hesab edir ki, iqtisadi artım və yeni iş yerlərinin yaradılması baxımından ən bacarıqlı aktorlar məhz sahibkarlardır. Eyni zamanda, fransızların 75 faizi ölkədəki şirkətlərin Avropanın digər dövlətləri ilə müqayisədə daha çox vergiyə cəlb olunduğunu düşünür.
Sorğu nəticələri sahibkarlara olan etimadın hökumətə qarşı inamsızlıqla birbaşa əlaqəli olduğunu da göstərir. Respondentlərin 69 faizi hesab edir ki, son hökumətlər sahibkarların üzləşdiyi real problemləri kifayət qədər anlamırlar. Bu mövqe Fransada siyasi idarəetmə ilə iqtisadi reallıqlar arasında getdikcə dərinləşən uçurumu əks etdirir.
Son illərdə biznes dünyasının tanınmış simaları ictimai debatlarda daha fəal iştirak etməyə başlayıblar. Eyni zamanda, Fransanın əsas işəgötürən təşkilatı olan “Medef”in rolu daha da güclənib. Təşkilat nümayəndələri müntəzəm olaraq baş nazir tərəfindən qəbul edilir, büdcə və digər əsas mövzularla bağlı həm hökumətlə, həm də media vasitəsilə müzakirələr aparırlar.
Bütün bunlar bir sualı daha da aktuallaşdırır: Fransada gələcəkdə siyasi liderlik ənənəvi siyasətçilərdən biznes dünyasının nümayəndələrinə keçə bilərmi? Sorğu nəticələri göstərir ki, bu fikir artıq cəmiyyətin böyük bir hissəsi üçün ciddi şəkildə müzakirə olunan alternativə çevrilib.
Bölmənin digər xəbərləri
