Futbol üzrə dünya çempionatının kuboku fevralın 9-da Bakıya gətiriləcək
Bakı, 22 yanvar, AZƏRTAC
“Coca-Cola” və AFFA futbol üzrə dünya çempionatının kubokunu Azərbaycana gətirir.
AZƏRTAC AFFA-ya istinadla xəbər verir ki, “Coca-Cola” şirkəti dünya çempionatının kubokunu dördüncü dəfə dünya turuna götürür və futbol dünyasının ən ali mükafatını Azərbaycan azarkeşlərinə göstərmək üçün fevralın 9-da kuboku Bakıya gətirəcək. Kubokun Azərbaycana səfəri “Coca-Cola” şirkətinin bu ölkədə uzunmüddətli tərəfdaşı olan AFFA ilə birgə əməkdaşlığı çərçivəsində təşkil olunur.
“Coca-Cola” tərəfindən təşkil olunan “FIFA dünya çempionatı kubokunun turu” milyonlarla azarkeşə dünyanın ən böyük idman hadisəsi olan futbol üzrə 2018-ci il dünya çempionatının bir hissəsi olmaq və bu andan zövq almaq imkanı verir. Bu möhtəşəm beynəlxalq turu təşkil etməklə “Coca-Cola” və FIFA bütün futbolsevərləri dünya kubokunun qalibinə təqdim edilən mükafatın canlı şahidi olmağa dəvət edirlər. Bu hadisə futbolun ən möhtəşəm simvolunu görmək və bunun sevincini yaşamaq üçün minlərlə azarkeşlərin həyatında yeganə fürsət olacaq.
“Coca-Cola” dünyada milyonlarla insanın ən sevilən idman növünə - futbola sevgisini dəstəkləyir və paylaşır. Futbol üzrə dünya çempionatlarının tərəfdaşı olmaqla yanaşı, “Coca-Cola” milli futbol federasiyaları, o cümlədən AFFA ilə əməkdaşlıq edərək, Azərbaycanda da minlərlə yeniyetmənin futbol arzularının reallaşmasına töhfə verir.
“Coca-Cola” şirkətinin Qafqaz və Mərkəzi Asiya regionu üzrə ictimaiyyətlə əlaqələr və kommunikasiya meneceri Aleksandra Akkirman deyib: “Biz dünya kubokunu fevralın 9-da Azərbaycana gətirməyi planlaşdırırıq. Bu kubok adi mükafat deyil, bu, həm də idman aləminin ən məşhur kuboku və insanları birləşdirən bir rəmzdir”.
“İdman dünyasında FIFA dünya kubokundan daha çox istənilən və əlamətdar bir mükafat yoxdur. Bu Kubok insanları birləşdirən bir qüvvədir və bunun əhəmiyyətini hər kəs dəyərləndirir. Kuboku dünya futbol azarkeşlərinə təqdim etmək üçün “Coca-Cola” ilə yenidən əməkdaşlıq etməyə çox şadıq”, - deyə FIFA-nın prezidenti Canni İnfantino qeyd edib.
FIFA dünya kuboku fevralın 9-da Heydər Əliyev Beynəlxalq Aeroportuna gətiriləcək. Yerli KİV nümayəndələri hava limanında mətbuat konfransında iştirak etmək üçün dəvət olunacaq və onlara mükafatı canlı görmək imkanı veriləcək. Sonra mükafat “Gənclik Mall” ticarət mərkəzinə gətiriləcək ki, burada şəhərin sakinləri və qonaqları dünya çempionatının əsas mükafatı ilə şəkil çəkdirə biləcəklər.
Tur barədə məlumat verən AFFA-nın baş katibi Elxan Məmmədov bildirib: “Dünya kubokunu yaxından görmək istənilən futbol azarkeşinin ən böyük arzularından biridir. “Coca-Cola” şirkəti və FIFA kubokun dünya turunu təşkil etməklə dünyanın müxtəlif ölkələrindəki çoxsaylı azarkeşlərə böyük sevinc bəxş edir. Tədbirin Azərbaycanda da keçirilməsi futbolun təbliğı və azarkeş marağı baxımından xüsusi əhəmiyyət daşıyır. Çox şadıq ki, “Coca-Cola” şirkəti ilə AFFA arasında uzunmüddətli və çoxşaxəli əməkdaşlıq mövcuddur. İnanırıq ki, birgə həyata keçirəcəyimiz layihələr hər zaman uğur qazanacaq”.
Ötən ilin sentyabrında Rusiyada start götürən tur altı qitədən 50-dən çox ölkəni əhatə edəcək və doqquz ay ərzində 126 min kilometr məsafə qət edən kubok səyahətini futbol üzrə 2018-ci il dünya çempionatında başa vuracaq.
“Coca-Cola” şirkəti 1974-cü ildən FIFA-nın korporativ tərəfdaşıdır və 1978-ci ildən dünya çempionatının rəsmi sponsorudur. “Coca-Cola” 1950-ci ildən etibarən futbol üzrə hər bir dünya çempionatının stadionlarında reklam yerləşdirir və bütün səviyyələrdə futbolu dəstəkləyir. “Trophy Tour” artıq dördüncü dəfədir FIFA və “Coca-Cola” şirkətinin birgə səyi ilə keçirilir.
Qeyd edək ki, dünya kubokunun əsli mundialın qalibi olan komandaya təqdim olunsa da FIFA-nın sərəncamında qalır. Qızıldan hazırlanmış 6,142 kiloqram ağırlığında olan kubokun kompozisiyası Yer Kürəsini əlləri üzərində saxlayan iki insan fiqurundan ibarətdir. Kubokun orijinal dizaynı 1974-cü ildə yaradılıb. Kubok dünyada ən məşhur və bahalı idman rəmzlərindən biridir. Ona yalnız mükafatın keçmiş qalibləri və dövlət başçıları olmaqla məhdud sayda insan toxuna bilər. Qaydalara əsasən, mükafat FIFA-nın sərəncamında qalır və dünya kubokunun qalib komandası mükafatın əslini müvəqqəti olaraq saxlayır, sonra isə onun replikasını alır. Həmən replika dünya kubokunun qaliblərinin mükafatı adlanır. Qızıl suyuna salınan mükafatın üzərində turnirin adı, çempionatı qəbul edən və qalib ölkələr haqqında məlumat həkk olunur.
Bölmənin digər xəbərləri
