Futbol üzrə II “Gənclər kuboku” turnirinin qalibləri mükafatlandırılmışlar
Bakı, 1 noyabr (AZƏRTAC). Xəbər verildiyi kimi, Gənclər və İdman Nazirliyi, AFFA və “İrəli” İctimai Birliyinin təşkilatçılığı ilə ümummilli lider Heydər Əliyevin 90 illiyinə həsr olunmuş futbol üzrə II “Gənclər kuboku” turniri yekunlaşmışdır.
AZƏRTAC xəbər verir ki, noyabrın 1-də AFFA-nın inzibati binasında mükafatlandırma mərasimi keçirilmişdir.
Çıxış edən AFFA-nın departamentinin rəisi Yusif Vəliyev və “İrəli” İctimai Birliyinin sədri Rauf Mərdiyev ölkəmizdə idmana göstərilən dövlət qayğısından danışmış və turnirin əhəmiyyətini yüksək qiymətləndirmişlər.
Azərbaycanda futbolun kütləviləşməsi istiqamətində həyata keçirilən layihələrdən danışan natiqlər növbəti “Gənclər kuboku” turnirinin təşkil olunması istiqamətində müzakirələrin aparıldığını vurğulamış və komandaları qazanılan uğur münasibətilə təbrik etmişlər.
Yarışda qalib gəlmiş Azərbaycan Tələbə Gənclər Təşkilatları İttifaqının komandasına qızıl medal, xatirə hədiyyələri və kubok təqdim olunmuşdur. Turnirdə Qan Donorları Assosiasiyası İctimai Birliyi ikinci, Gənc Azərbaycanlıların Ukraynadakı Cəmiyyətinin kollektivi isə üçüncü olmuşlar.
Bölmənin digər xəbərləri
