Futzal üzrə Azərbaycan millisinin qapıçısı: Fransa ilə oyun bizim üçün finala bərabərdir
Bakı , 26 yanvar, AZƏRTAC
Avropa çempionatından əvvəl İran kimi güclü komanda ilə qarşılaşmaq xeyrimizə oldu. Bu matçlarda səhvlərimizi müəyyənləşdirdik, hansı çatışmazlıqları aradan qaldırmalı olduğumuzu dəqiqləşdirdik.
AZƏRTAC xəbər verir ki, bu sözləri futzal üzrə Azərbaycan millisinin qapıçısı Rövşən Hüseynli deyib.
Futzalçı bildirib ki, birinci oyun daha sürətli və bir qədər də aqressiv keçdi. Thaqonun yoxluğu müdafiədən çıxmağımızda, eləcə də hücumlar qurmağımızda bizə çətinlik yaratdı. Məşqlərdə bu cür tapşırıqları edərkən oyunu əsasən onun üzərində qururduq. Məcbur olub başqa taktika ilə oynadıq. İkinci oyunda sürət aşağı idi ki, bunu da yorğunluqla əlaqələndirmək olar. Çünki belə güclü komanda ilə ardıcıl iki gün ərzində oynamaq çox çətindir. Həm də Vassouranın yoxluğu hiss olundu.
“İran və Avropa çempionatının qrup mərhələsindəki rəqibimiz Fransa yığmalarının oyun üslubu bir-birinə yaxındır. Bu da bizim üçün əla sınaq oldu. Komandamız Avropa çempionatına təxminəm 80-90 faiz hazırdır. Qarşıdakı 7-8 gündən də maksimum istifadə edəcəyik. Təbii ki, rəsmi və yoldaşlıq oyunları tam fərqlidir. Çalışdıq Fransa ilə oyunda etmək istədiklərimizi bu matçlarda tətbiq edək. Fransa ilə oyun bizim üçün finala bərabərdir. Çünki növbəti mərhələyə aparan yol bu matçdan başlayır. Komandamız üçün uğurlu bir yarış olacağına inanıram”, - deyə Rövşən Hüseynli əlavə edib.
Qeyd edək ki, Avropa çempionatının hazırlığını Bakıda davam etdirən futzal üzrə Azərbaycan millisi İran yığması ilə iki yoldaşlıq oyunu keçirib. İlk oyunda 3:3 hesablı heç-heçə edən komandamız ikinci qarşılaşmada məğlub olub - 1:4.
Bölmənin digər xəbərləri
