Füzuli sakinləri Zəfər bayramını qürurla qeyd edirlər
Füzuli, 8 noyabr, Aydın Yavərzadə, AZƏRTAC
Qarabağ Zəfərindən beş il ötür. İşğaldan azad olunan Füzuli şəhərində həyat yenidən canlanır. Bir zamanlar dağıdılmış, viran qoyulmuş küçələrdə bu gün quruculuq işləri və yeni həyatın addımları eşidilir. Sakinlərin doğma yurda Böyük Qayıdışı, müasir şəhər infrastrukturunun qurulması, məktəblər, yollar, mədəniyyət mərkəzləri və digər inşaat layihələri Füzulinin dirçəlişinə nümunədir. Zəfər bayramını doğma torpaqda qeyd etmək bu torpağın hər daşını, hər nəfəsini Vətən bilən insanlar üçün, sözün əsl mənasında, böyük qürur hissidir.
AZƏRTAC-ın bölgə müxbiri xəbər verir ki, bu gün Füzuli həm qəhrəmanlıq ünvanı, həm də Böyük Qayıdışın rəmzlərindən biridir. Hər iki müharibədə iştirak edən Əhmədov Taleh deyir ki, Füzuliyə qovuşmaq sanki yenidən dünyaya gəlmək kimidir: "Bu gün Zəfər bayramıdır. Bu bayramın sevincini yaşamaq bizim üçün böyük qürurdur. İki müharibənin iştirakçısı olmuş bir hərbçi kimi, ilk növbədə, səngərdə çiyin-çiyinə döyüşdüyüm bütün qardaşlarımı, həmçinin şəhid olmuş qəhrəmanlarımızın ailələrini Zəfər bayramı münasibətilə təbrik edirəm. Şəhidlərimiz canları ilə bu torpağı qorudular. Bir zamanlar işğal altında qalan Füzuli rayonunun bu gün azad və abad şəkildə yenidən dirçəlməsi bizim üçün böyük sevincdir. Mənim üçün çox qürurvericidir”.
Şəhid atası Bəhruz Mikayılov vurğulayır ki, Füzulidə yaşamaq böyük sevinc və qürur mənbəyidir: “Bu gün biz azad olunmuş Füzuli şəhərində yaşayırıq. Burada yaşamaq bizim üçün böyük sevinc və qürur mənbəyidir. Biz öz doğma, azad olunmuş torpaqlarımızda yaşayırıq. Allah bütün şəhidlərimizin ruhunu şad eləsin. Biz Ali Baş Komandanımızın rəhbərliyi altında yumruq kimi birləşdik və torpaqlarımızı yağı düşməndən azad etdik. Bu gün Füzuli şəhərində çox gözəl, müasir şəhər salınıb. Biz yenidən yurdumuzda yaşayırıq və bundan böyük fəxarət ola bilməz. Mən 1993-cü ildə Füzulidən çıxanda 4-cü sinif şagirdi idim. Bu gün isə şəhid atası kimi öz doğma torpağıma qayıtmışam. Oğlum Ağdərə istiqamətində döyüşlərdə qəhrəmancasına şəhid olub. O, mənə vəsiyyət etmişdi: “Əgər mən şəhid olsam, mütləq öz doğma torpağımızda yaşayın”. Və bu gün mən qürurla, başı uca öz yurdumda yaşayıram”.
Füzuli sakini Abbas Əliyev bildirir ki, 8 Noyabr – Zəfər Günü ən gözəl bayramdır. "30 ilə yaxın tək arzu ilə yaşadım: Füzuliyə, Vətənimə qayıdım. Allah şəhidlərimizə rəhmət etsin, qazilərimizə şəfa versin, Azərbaycanın qalib Ordusu hər zaman var olsun. Ali Baş Komandan İlham Əliyevin rəhbərliyi ilə qəhrəman hərbçilərimiz illərin həsrətinə son qoydu. Biz öz doğma yurdumuza qayıtdıq. Məcburi köçkünlük vaxtı Bakıda dövlətimiz tərəfindən hərtərəfli qayğı ilə əhatə olunmuşduq. Lakin Vətəndən uzaq olduğum üçün özümü narahat hiss edirdim. Füzuliyə qayıdanda sanki cənnətə gəldim. Bu yerdə dünyaya göz açmışam, burada böyüyüb boya-başa çatmışam. Bu yerlərin hər qarışı, hər daşı bizlər üçün müqəddəsdir. Füzulimiz yenidən dirçəlib, əsl sahiblərinə qucaq açıb, sakinlər üçün bütün şərait yaradılıb”.
Bölmənin digər xəbərləri
