Füzulidə Vətən müharibəsi şəhidlərinin xatirəsi anılıb
Füzuli, 9 noyabr, Aydın Yavərzadə, AZƏRTAC
Füzulidə Vətən müharibəsi şəhidlərinin anım günündə məzarları ziyarət olunub. Müqəddəs amal uğrunda şəhadətə ucalan şəhidlərin şərəfli həyatından söhbət açılıb.
AZƏRTAC-ın bölgə müxbiri xəbər verir ki, şəhidlərin anım mərasimində ailə üzvləri ilə bərabər, rayon icra hakimiyyətinin əməkdaşları, təhsil və mədəniyyət işçiləri, şəhid ailələri, qazilər, kənd sakinləri və ziyalılar iştirak ediblər.
***
Zalov Fəqan Amil oğlunun ilk döyüş yolu 2016-cı il aprelin döyüşlərindən başlayıb. Həmin döyüşlərdə yaralanan əsgər Fəqan Zalov müalicəsi bitdikdən sonra xidmətini davam etdirib. O, xidmətini bitirdikdən sonra xüsusi kursdan keçərək Azərbaycan Hərbi Dəniz Qüvvələrində müddətdən artıq həqiqi hərbi xidmət qulluqçusu olaraq Vətən keşiyində dayanıb. Xidməti dövründə kəşfiyyatçı olaraq “Dağçılıq”, “Paraşüt”, “Antiterror”, “Amfibiya” kurslarını bitirib və Fəqan Zalov "Azərbaycan Ordusunun 100 illiyi (1918-2018)” yubiley medalı ilə təltif edilib. Vətən müharibəsi zamanı Cəbrayıl, Qubadlı, Xocavənd istiqamətində gedən döyüşlərdə iştirak edib.
Fəqan Zalov noyabrın 9-da Xocavənd rayonunun “Qızılqaya” adlı ərazisində gərgin döyüşlər zamanı şəhid olub. Ölümündən sonra “Vətən Müharibəsi Qəhrəmanı” adı verilib, həmçinin "Vətən uğurunda", "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə", "Qubadlının azad olunmasına görə" medalları ilə təltif olunub.
***
Tarıverdiyev Cabir Səmid oğlu həqiqi hərbi xidmətini bitirdikdən bir müddət sonra müddətdən artıq qulluqçu kimi Vətən keşiyində dayanıb. Aprel döyüşlərində Lələtəpənin azad edilməsi zamanı bir tankçı kimi iştirak edib. Xidməti illərində “Azərbaycan Respublikası Silahlı Qüvvələrinin 95 illiyi (1918-2013)” yubiley medalı, “Azərbaycan Ordusunun 100 illiyi (1918-2018)” yubiley medalı və bir çox fəxri fərmanlarla təltif edilib. Vətən müharibəsi zamanı Cəbrayıl, Füzuli, Qubadlı, Xocavənd və Şuşa istiqamətində gedən döyüşlərdə tank komandiri olaraq iştirak edib. İki dəfə yaralansa da, müalicədən imtina edib. Müharibə başlayan gündən birlikdə olduqları döyüş yoldaşları - tuşlayıcı Ələsgərov Yusif Yaşar oğlu, sürücü-mexanik Abdullayev Elgün Əmirxan oğlu ilə birgə Cabir Tarıverdiyev noyabrın 7-də Şuşa istiqamətində gedən döyüşlərdə şəhidlik zirvəsinə ucalıblar. Cabir Tarıverdiyev ölümündən sonra 3-cü dərəcəli "Vətənə xidmətə görə" ordeni və “Vətən uğrunda”, “Döyüşlərdə fərqlənməyə görə”, “Cəbrayılın azad olunmasına görə”, “Füzulinin azad olunmasına görə”, “Qubadlının azad olunmasına görə”, “Xocavəndin azad olunmasına görə”, “Şuşanın azad olunmasına görə” medalları ilə təltif edilib.
***
Məcidzadə Teymur Tehran oğlu 1992-ci ildə Füzuli rayonu Gecəgözlü kəndində anadan olub. Füzulinin Ermənistan Silahlı Qüvvələri tərəfindən işğal edilməsindən sonra Məcidzadələr ailəsi Bakıda məskunlaşıblar. Teymur Məcidzadə Vətən müharibəsi zamanı Cəbrayılın, Füzulinin və Şuşanın azadlığı uğrunda gedən döyüşlərdə iştirak edib, noyabrın 9-da Şuşa döyüşləri zamanı qəhrəmancasına şəhid olub. Teymur Məcidzadə ölümündən sonra 3-cü dərəcəli "Rəşadət" ordeni, "Vətən uğrunda", "Cəbrayılın azad olunmasına görə", "Füzulinin azad olunmasına görə", "Şuşanın azad olunmasına görə", "Hərbi xidmətlərə görə" medalları ilə təltif edilib.
Bölmənin digər xəbərləri
