“Gəncə” idman klubunun baş məşqçisi mükafatlandırılıb
Bakı, 18 aprel, AZƏRTAC
“Gəncə” idman klubunun cüdo üzrə baş məşqçisi Samir İsmayılov mükafatlandırılıb. Mütəxəssis 2021-2022-ci illərdə aktiv fəaliyyətinə görə təltif edilib.
Klubun mətbuat xidmətindən AZƏRTAC-a bildiriblər ki, S.İsmayılova plaketi və xatirə hədiyyəsini “Gəncə” idman klubunun rəhbəri Elvar Osmanov və Gəncə Şəhər Gənclər və İdman İdarəsinin rəisi Həmid Nəsirov təqdim ediblər.
S.İsmayılov diqqətə görə, minnətdarlığını bildirib və əzmkarlığı davam etdirib gələcəkdə də yeni uğurlara imza atacaqlarına əminliyini ifadə edib.
Cari ilə yetirmələrinin uğurla start verdiyini diqqətə çatdıran baş məşqçi deyib: “İlin əvvəlində Göygöldə təşkil olunan beynəlxalq turnirdə klubumuzun üzvlərindən Cahid Əlizadə qızıl və Elsevər Verdiyev bürünc medal qazanıblar. “Təhsil” Respublika İdman Mərkəzinin birinciliyində 3 tələbəm nəticə əldə etdi. Əli Cəfərov yarışı birinci, Sadiq Məmmədov ikinci, Tunar Abdullayev isə üçüncü pillədə başa vurublar. Yetirmələrim təqvimdə yer almayan bir neçə yarışda da iştirak edib və çoxlu sayda medal qazanıblar”.
“Usta çüdoçuların respublika çempionatı da klubumuz üçün uğurlu alındı. Bütün rəqiblərimə qalib gələrək Azərbaycan çempionu adını qazandım. Komandamızın heyətində Tural Abbasov və Azər Cəfərov fəxri kürsünün ən yüksək pilləsinə qalxıblar. Səbuhi Vəliyev və Vüsal İsmayılov gümüş medalı boyunlarından asıblar”, - deyə baş məşqçi əlavə edib.
S.İsmayılov qeyd edib ki, əsas məqsədimiz Gəncədə perspektivli uşaqların cüdo idman növünə cəlb olunmasına nail olmaqdır. Çünki klubda idmançılar üçün hər cür şərait yaradılıb. Azərbaycan Prezidenti İlham Əliyevin idmana göstərdiyi diqqət və qayğı, idmançılarımızın beynəlxalq arenada qazandığı nailiyyətlər və ölkəmizin irimiqyaslı yarışlara yüksək səviyyədə ev sahibliyi etməsi Azərbaycanı dünyada idman ölkəsinə çevirib. Biz də qazandığımız nailiyyətlərlə aparılan uğurla idman siyasətinə öz töhfəmizi vermək istəyirik.
Bölmənin digər xəbərləri
