GƏNCƏDƏ 20 YANVAR ŞƏHİDLƏRİNİN XATİRƏSİ EHTİRAMLA YAD EDİLİR
Gəncə, 15 yanvar (AZƏRTAC). 20 Yanvar şəhidlərinin xatirəsi Gəncədə də bir sıra tədbirlərlə yad edilir.
Şəhər icra hakimiyyətindən verilən məlumatda deyilir ki, anım tədbirlərinə Gəncənin bütün idarə, müəssisə və təşkilatlarında, eləcə də ali və orta ümumtəhsil müəssisələrində keçirilən elmi-praktiki konfranslar və “dəyirmi masa”larla başlanılmışdır. Həmin tədbirlərdə 1990-cı ilin 20 yanvarında xalqımızın başına gətirilən müsibətlər bir daha yada salınır, sənədli filmlər nümayiş etdirilir.
Ümumxalq Hüzn Gününə Gəncə uşaq rəsm qalereyasında və incəsənət məktəbində geniş hazırlıq işləri görürlər. Hazırda məktəbli rəssamlar şəhidlərin xatirəsinə həsr olunacaq sərgi üçün rəsm əsərləri üzərində işləyirlər.
Yanvarın 19-da ümumtəhsil məktəblərində ilk dərslər 20 Yanvar şəhidlərinin xatirəsinə həsr olunacaqdır.
Ümumşəhər anma tədbirləri 20 Yanvar şəhidlərinin xatirəsinə ucaldılmış abidə önündə keçiriləcək mərasimlə başa çatacaqdır.
Bölmənin digər xəbərləri
