Bakı, 25 iyul, AZƏRTAC

Azərbaycan Respublikası Gənclər Təşkilatları Milli Şurası həmvətənlərimizə

qarşı erməni diaspor nümayəndələrinin təxribatçı əməlləri ilə bağlı bəyanat yayıb.

AZƏRTAC xəbər verir ki, bəyanatda iyulun 12-dən başlayaraq Ermənistan silahlı qüvvələrinin Azərbaycan-Ermənistan sərhədinin Tovuz rayonu istiqamətində törətdiyi hərbi təxribatla bağlı xarici ölkələrdəki həmvətənlərimiz, xüsusən gənclər tərəfindən keçirilən aksiyalar zamanı dinc nümayişçilərə qarşı radikal erməni qüvvələri tərəfindən ifrat aqressivlik nümayiş etdirildiyi və təxribatçı əməllərin həyata keçirildiyi vurğulanır. Bildirilir ki, Ermənistan tərəfinin psixoloji və fiziki zorakılığa əl atdığı belə insidentlər Fransa, Böyük Britaniya, İsveç, Polşa, Avstraliya, ABŞ, Niderland və Belçikada baş verib. Erməni diasporunun üzvləri Azərbaycanın diplomatik nümayəndəliklərinin binalarına, eləcə də azərbaycanlıların dinc aksiyalarına qarşı vandalizm hərəkətlərinə əl atıb, soydaşlarımıza xəsarət yetirmək məqsədi güdən və cinayət məsuliyyəti doğuran təxribatlar törədiblər.

Bəyanatda deyilir: “Xarici ölkələrdə yaşayan və təhsil alan yüz minlərlə azərbaycanlının bu hadisələrlə əlaqədar keçirdiyi hiss və həyəcanı dərindən başa düşərək və bölüşərək, ölkənin bir çox aparıcı gənclər təşkilatlarını və on minlərlə gənci ətrafında birləşdirən Azərbaycan Respublikası Gənclər Təşkilatları Milli Şurası olaraq, radikal erməni ünsürlərinin soydaşlarımıza qarşı yönələn bu cinayət əməllərini qətiyyətlə pisləyirik. Bu kimi təxribatların qarşısının alınmasına məsul olan qurumların vəzifələrinə tam məsuliyyətlə yanaşmalarını gözləyir, vandalizm aktlarının aidiyyəti dövlətlərin hüquq-mühafizə orqanları tərəfindən araşdırılmasını və bu cinayətləri törədənlərin hərəkətlərinə hüquqi qiymət verilməsini tələb edirik”.

Vurğulanır ki, bu gün hansı ölkədə yaşamasından asılı olmayaraq bizim hamımızın azərbaycanlı olaraq üzərimizə düşən əsas vəzifə isə belə həssas məqamda sayıqlıq, soyuqqanlılıq, həmrəylik nümayiş etdirmək, ermənilərin iç üzünü dinc yollarla, təmkinlə bütün dünyada ifşa etmək, təxribatlara yalnız hüquqi müstəvidə, qanunvericilik çərçivəsində cavab verilməsinə nail olmaqdan ibarətdir.

“Əminliyimizi ifadə etmək istərdik ki, xarici ölkələrdə yaşayan soydaşlarımız bu məsələdə də birlik və həmrəylik nümayiş etdirəcək, dövlətimizin və Prezidentimizin Ermənistanın işğalçılıq siyasətinin bütün dünyada ifşa edilməsinə yönəlmiş fəaliyyətinə öz dəstəklərini əsirgəməyəcək, ermənilərin mənfur siyasətinin bütün istiqamətlərdə iflasa uğramasına nail olacaqlar”, - deyə bəyanatda vurğulanır.

Bəyanatda Azərbaycan Respublikasının Birinci vitse-prezidenti Mehriban Əliyevanın həmvətənlərimizə müraciətindəki bu fikirlər yer alıb: “Qoy, heç kim şübhə etməsin ki, heç bir provokasiya bizi haqq yolundan dönməyə məcbur edə bilməz. Biz milyonlarlayıq, bizim bir məqsədimiz var - Vətəni müdafiə etmək, onun ərazi bütövlüyünü və tarixi həqiqəti bərpa etmək.

Ona görə ki, Qarabağ Azərbaycandır və nida işarəsi!”