Gənclər və idman naziri Goranboyda vətəndaşların müraciətlərini dinləyib
Bakı, 6 noyabr, AZƏRTAC
Gənclər və idman naziri Azad Rəhimov noyabrın 6-da Goranboy rayonunda Gəncə, Naftalan şəhərləri, Ağstafa, Daşkəsən, Goranboy, Göygöl, Gədəbəy, Qazax, Samux, Şəmkir və Tovuz rayon sakinlərini qəbul edib.
Nazirlikdən AZƏRTAC-a bildiriblər ki, Heydər Əliyev Mərkəzində keçirilən qəbulda ümumilikdə 40-a yaxın vətəndaş iştirak edib. Müraciətlər əsasən gənclər, idman, tikinti sahələri, ipoteka kreditlərinin verilməsi, iş ilə təminatla bağlı olub.
Gənclər sahəsi üzrə qeyri-hökumət gənclər təşkilatlarının yaradılması, layihələrin maliyyələşdirilməsi, gənclərin beynəlxalq layihələrdə iştirakı, yay istirahət düşərgələrinin təşkili, gənclər mərkəzlərinin müvafiq avadanlıqlarla təmin edilməsi və fəaliyyəti ilə bağlı 10-a yaxın müraciət edilib.
İdman sahəsində fəxri adların verilməsi, idman mərkəzlərinin avadanlıqlarla təmin olunması, olimpiya idman komplekslərinin, idman qurğularının tikintisi və təmiri, Uşaq Gənclər və İdman mərkəzlərinin və bölmələrin yaradılması və digər məsələlərlə bağlı 15-dən çox müraciət qeydə alınıb.
Digər müraciətlər ipoteka kreditlərinin verilməsi, iş ilə təminat və şəxsi məsələlərlə bağlı olub.
Bir sıra müraciətlər yerindəcə həllini tapıb. Araşdırılması tələb edilən məsələlər isə aidiyyəti qurumlara göndərilməsi üçün nəzarətə götürülüb.
Bölmənin digər xəbərləri
