Gənclərin festivalı “YayFest 2025”ə start verildi - 2000-dən çox gənc bir arada VİDEO
Şamaxı, 7 iyul, Rəşad Türkoğlu, AZƏRTAC
Gənclər festivalı “YayFest” bu il də Şamaxıda öz qapılarını gənclərə açıb. 2025-ci il “Konstitusiya və Suverenlik İli” çərçivəsində təşkil edilən festival Gənclər Fondunun dəstəyi, IDEA İctimai Birliyi, Azərbaycan Tələbə Gənclər Təşkilatları İttifaqı, Azərbaycan Könüllü Təşkilatları İttifaqı, “CAVAN” Gənclər Hərəkatı İctimai Birliyi və “Gənc Könüllülər” İctimai Birliyinin birgə təşkilatçılığı ilə keçirilir.
AZƏRTAC-ın bölgə müxbiri xəbər verir ki, təbiət qoynunda təşkil edilən festivalın əsas məqsədi dövlət gənclər siyasətinin təşviqi, gənclərin şəxsi və peşəkar inkişafına, şəbəkələşməsinə dəstək verilməsi, asudə vaxtın səmərəli və əyləncəli təşkili, gənclərdə vətənpərvərlik ruhunun gücləndirilməsi, yaradıcı və təşəbbüskar gəncliyin formalaşdırılmasıdır. Bu il “Konstitusiya və Suverenlik İli”nə həsr edilən festival çərçivəsində Konstitusiya prinsiplərinin təbliği, Qarabağ Zəfərinin 5 illiyinin qeyd edilməsi, gənclərin milli ruhunun artırılması, dövlətçilik dəyərlərinə sadiqliyin möhkəmləndirilməsi, milli ideoloji hazırlığın gücləndirilməsi istiqamətində müxtəlif təlimlər və sessiyalar təşkil olunacaq.
Avqustun 29-dək keçiriləcək festival müddətində “Milli-mənəvi dəyərlər”, “Həmrəylik”, “Humanizm”, “Ədalət və qanun”, “İnkişaf”, “Vətənpərvərlik”, “Müstəqillik tarixi” və “Qalib diplomatiya” adlı 8 ardıcıl düşərgə olacaq. İki ay boyunca davam edəcək festivalda 2000-dən çox gəncin iştirakı nəzərdə tutulub və düşərgə iştirakçıları üçün bütün zəruri şərait təmin edilib.
Düşərgə iştirakçıları əvvəlcə Ümummilli Lider Heydər Əliyevin Şamaxı rayonundakı abidəsini ziyarət edərək, önünə gül dəstələri qoyublar. Dövlət Himninin səsləndirilməsi ilə başlayan açılış mərasimində Azərbaycanın suverenliyi uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Sonra Gənclər Fondunun İcraçı direktor vəzifəsini icra edən Yusif Vəliyev çıxış edərək, Prezident İlham Əliyevin Sərəncamı ilə 2025-ci ilin “Konstitusiya və Suverenlik İli” elan olunmasının gənclərimizin dövlətçilik prinsiplərinə daha dərindən yiyələnməsi, hüquqi biliklərinin möhkəmləndirilməsi və vətəndaş məsuliyyətinin formalaşması baxımından əhəmiyyətli imkanlar yaradacağını qeyd edib.
Düşərgə müddətində Müzəffər Ali Baş Komandan İlham Əliyevin rəhbərliyi altında Vətən müharibəsində qazanılmış Zəfərimizə və Azərbaycan dövlətçilik tarixinə həsr olunmuş görüşlər keçiriləcək. Peşəkar təlimçilər tərəfindən açıq havada müxtəlif mövzular üzrə təlimlər və panel müzakirələr, Konstitusiya, suverenlik və milli dəyərlər mövzularında interaktiv sessiyalar və vörkşoplar təşkil ediləcək, master-klaslar, idman yarışları, intellektual oyunlar və konsert proqramları keçiriləcək.
Gənclər Fondu gəncləri http://yayfest.az/ veb-səhifəsi vasitəsilə qeydiyyatdan keçərək, növbəti düşərgələrdə iştirak üçün seçimlərə qatılmağa dəvət edir. Seçimlər zamanı 18-25 yaş arası ictimai fəallığı ilə seçilən gənclərə üstünlük veriləcək. Hər gənc yalnız bir düşərgədə iştirak edə bilər.
Bölmənin digər xəbərləri
