Gömrük nəzarətindən gizlədilən mobil telefon və dərman preparatları aşkarlanıb
Bakı, 19 iyun, AZƏRTAC
Gömrük nəzarətindən gizlədilən mobil telefon və dərman preparatları aşkarlanıb.
Dövlət Gömrük Komitəsinin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, Şimal Ərazi Baş Gömrük İdarəsinin Əməliyyat və təhqiqat şöbəsinə daxil olan məlumat əsasında Rusiya istiqamətindən “Samur” gömrük postunun idxal gömrük nəzarəti xəttinə daxil olan Azərbaycan vətəndaşının idarə etdiyi “DAF” markalı yük avtomobili saxlanılıb və gömrük baxışı keçirilib. Yoxlama zamanı nəqliyyat vasitəsinin kabinəsində olan oturacağın və yataq yerinin altında gömrük nəzarətinə bəyan olunmayan 7 ədəd “iPhone 11 64 GB” markalı mobil telefon, kabinənin ön panelinin alt hissəsindəki boşluqda isə gömrük nəzarətindən gizlədilən 2500 kapsul dərman preparatı aşkarlanıb.
Faktla bağlı araşdırma aparılır.
Bölmənin digər xəbərləri
