GÖMRÜK SAHƏSİNDƏ QAZANILAN UĞURLAR YÜKSƏK QİYMƏTLƏNDİRİLMİŞDİR
Komitənin sədri Beynəlxalq Valyuta Fondunun tövsiyəsi ilə 2002-ci ildən başlayaraq, gömrük sistemində islahat proqramının müvəffəqiyyətlə həyata keçirildiyini, spesifik rüsumların advalor rüsumlarla əvəz olunmasının birinci, ikinci və üçüncü mərhələlərinin yekunlaşdığını diqqətə çatdırmışdır. O demişdir ki, Nazirlər Kabinetinin müvafiq qərarları ilə 10 mal qrupu üzrə tətbiq olunan spesifik rüsumlar 15 faiz dərəcəsi ilə advalor rüsumlarla əvəz olunmuşdur.
Texniki yardıma ehtiyacla bağlı fikirlərini açıqlayan Kəmaləddin Heydərov gömrük orqanlarının müasir texniki nəzarət vasitələri ilə təchiz olunmasını, qaçaqmalçılığın və gömrük işi sahəsində digər cinayətlərin qarşısının alınmasını, statistika və informasiya texnologiyalarının müasir proqram təminatı ilə təchiz edilməsini və digər tədbirləri beynəlxalq maliyyə təşkilatlarının köməyi sayəsində mümkünlüyünü xüsusi vurğulamışdır.
O, indiyədək dövlət büdcəsinə ödəmələrin vaxtından əvvəl yerinə yetirildiyini, 2004-cü il üçün dövlət büdcəsinə 1 trilyon 120 milyard manat vergi və rüsumların köçürülməsinin təmin olunacağını söyləmişdir.
Verilən ətraflı məlumata görə təşəkkürünü bildirən Beynəlxalq Valyuta Fondu missiyasının rəhbəri Con Uikman Linn, gömrük sistemində islahatlar proqramının cədvələ uyğun olaraq həyata keçirilməsini təqdir etmiş, gömrük xidmətinin modernləşdirilməsi ilə bağlı görülən işlərdən razı qaldığını və xüsusi yardımın göstərilməsi üçün Beynəlxalq Valyuta Fondunun əməli tədbirlər görəcəyini bildirmişdir.
Görüşdə bir sıra digər məsələlər ətrafında da fikir mübadiləsi aparılmışdır.
