Zaqatala rayonundakı “Göyəm” istehsal kooperativi fermer təsərrüfatlarına aqroservis xidməti təşkil edən və toxum satışı ilə məşğul olan qabaqcıl müəssisələrdəndir.

1997-ci ildən fəaliyyət göstərən bu müəssisədə kənd təsərrüfatı işlərinin yerinə yetirilməsi üçün hər cür texnika cəmlənmişdir.

Müəssisədən AZƏRTAC-ın müxbirinə bildirmişlər ki, ötən il fermer təsərrüfatlarına 25 milyon manatlıq texniki xidmət göstərilmiş və fermerlərə 10 ton toxuculuq buğda satılmışdır. Cari ilin məhsulu üçün 50 hektar sahədə payızlıq buğda əkilmişdir.

Hazırda 15 nəfər işçinin çalışdığı bu müəssisədə fermerlərə göstərilən aqroservis xidmətini daha da genişləndirmək üçün güzəştli kreditlərin alınmasına ciddi ehtiyac vardır.