CƏMİYYƏT
Güclü hava burulğanı Zaqatalada ciddi fəsadlar törətmişdir
Zaqatala, 25 iyun (AZƏRTAC). İyunun 25-də səhər saat 3-4 radələrində Zaqatala rayonu ərazisində baş vermiş təbii fəlakət - güclü külək, leysan yağışı və hava burulğanı nəticəsində rayon ərazisində əkin sahələrinə, meşə zolağına, elektrik naqillərinə, infrastruktura ciddi ziyan dəymişdir.
AZƏRTAC xəbər verir ki, güclü hava burulğanı nəticəsində təkcə Yevlax-Balakən avtomobil yolunun 119-cu kilometrliyində, hava limanının yaxınlığında 100-dən artıq iri gövdəli ağac yıxılmışdır. Rayonun əksər yaşayış məntəqələrinə elektrik enerjisinin verilişi kəsilmişdir.
Güclü külək və leysan rayonun dağətəyi kəndlərində təsərrüfat tikililərinə də ciddi ziyan vurmuş, onlarla evin zirzəmisinə yağış suları düşmüşdür. Güclü külək və yağış nəticəsində 500 hektardan artıq taxıl zəmisi yerə yatmışdır.
Hazırda rayon fövqəladə hallar komissiyası və aidiyyəti qurumlar təbii fəlakətin nəticələrinin aradan qaldırılması istiqamətində operativ tədbirlər həyata keçirir. Bu işlərə 30-dan artıq müxtəlif təyinatlı texnika və xeyli işçi qüvvəsi cəlb edilmişdir. Gün ərzində rayonun bütün yaşayış məntəqələrinə elektrik enerjisinin verilişi təmin ediləcəkdir.