Güclü külək Berlində ciddi fəsadlara səbəb olub, ölən və xəsarət alanlar var
Berlin, 24 iyun, AZƏRTAC
Berlində axşam saatlarında baş vermiş güclü külək və yağış ciddi fəsadlara səbəb olub.
AZƏRTAC “Tagesspiegel” qəzetinə istinadla xəbər verir ki, Berlinin Şpandau rayonunda ağacın aşması nəticəsində bir qadın ölüb. Şəhərin müxtəlif yerlərində ağacların insanların və nəqliyyat vasitələrinin üzərinə aşması nəticəsində bir neçə nəfər də xəsarət alıb.
Təxminən 1,5 saat ərzində Berlin şəhər yanğınsöndürmə xidməti 400-dən çox çağırışa cavab verib. Güclü tufanla əlaqədar saat 17:25-dən etibarən Berlindəki şəhərdaxili bütün 16 əsas elektrikli xətt üzrə qatarların hərəkəti dayandırılıb. Bu xətlər üzrə hərəkət axşam saat 21:30-dan etibarən mərhələli şəkildə bərpa olunub. Berlin-Hamburq dəmir yolu xətti də qısa müddətə bağlansa da, axşam saatlarında yenidən istifadəyə verilib.
Tufan gecə saatlarında zəifləyib.
AZƏRTAC-ın xüsusi müxbiri
Berlin
Bölmənin digər xəbərləri
