Gürcüstan polisi ölkə ərazisində xüsusi əməliyyat keçirib
Tbilisi, 23 aprel, AZƏRTAC
Gürcüstan Daxili İşlər Nazirliyi (DİN) ölkə ərazisində silahlı qruplaşmalara qarşı xüsusi əməliyyat keçirib.
AZƏRTAC xəbər verir ki, bu barədə DİN-in məlumatında deyilir.
Bildirilir ki, Tbilisi, Sameqrelo-Zemo Svaneti, Kvemo Kartli, Şida Kartli, İmereti, Acarıstan və Samtsxe-Cavaxeti regionlarında qanunsuz olaraq odlu silah-sursat saxlayan 18 nəfər saxlanılıb.
Hüquq-mühafizə orqanlarının əməkdaşları saxlanılan şəxslərin evlərində, nəqliyyat vasitələrində və anbarlarında axtarış aparıb, oradan müxtəlif növ odlu silah və döyüş sursatı, o cümlədən çoxlu sayda avtomat, tapança, ov tüfəngi, əl qumbaraları, çoxlu sayda patron, bir neçə partlayıcı mərmi və kapsul detonatorları maddi sübut kimi götürülüb.
Polis, həmçinin yoxlanış zamanı narkotik vasitə olan “qurudulmuş marixuana” və qeydiyyat qaydalarını pozaraq quraşdırılmış “Lent mişar” götürüb.
Faktla bağlı Cinayət Məcəlləsinin 236, 273 və 287-ci maddələri ilə istintaq başladılıb.
Saxlanılan şəxsləri 9 ilədək azadlıqdan məhrumetmə cəzası gözləyir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
