“Bitcoin”in ilin sonunadək 100 min dollara çatması ehtimalı 17 faiz qiymətləndirilir
Bakı, 28 oktyabr, AZƏRTAC
“Bitcoin”in qiymətinin ilin sonunadək 100 min dollara çatması ehtimalı 17 faiz səviyyəsində qiymətləndirilir.
AZƏRTAC xəbər verir ki, dünyanın əsas kriptovalyutasının qiyməti 87 min dolları ötəndən sonra yenidən 80 min dollar səviyyəsinə enib.
İnvestorların xərclərini qarşılamaq və ya mənfəətlərini reallaşdırmaq məqsədilə qiymət artımı zamanı satışlara üstünlük verməsi “Bitcoin”in bahalaşması qarşısında təzyiqi artırır. Son iki ildə alış edən investorların təxminən 87 min dollar səviyyəsində xərclərini qarşılamaq imkanı əldə etməsi bu qiymət həddini mühüm satış səviyyəsinə çevirir.
İnflyasiya göstəriciləri, ABŞ-İran müharibəsi və süni intellekt şirkətlərinin səhmlərindəki dalğalanmalar da “Bitcoin”in qiymətinə təsir göstərir. Kriptovalyutanın səhm bazarı ilə korrelyasiyası oktyabrın ortalarında may ayının sonundan bəri ən yüksək səviyyəyə çatıb. “Bitcoin”in qiyməti isə bu ay təxminən 4 faiz azalıb.
“Glassnode” şirkəti xəbərdarlıq edib ki, “Bitcoin”in qiymətinin 81 min 500 dollar səviyyəsindən aşağıda bağlanması “Bitcoin” birjasında ticarət olunan fondlarına investisiya yatıran şəxsləri zərərə sala və yaxın müddətdə qiymətə dəstək səviyyəsini zəiflədə bilər.
Ekspertlər isə davamlı bahalaşma trendindən danışmaq üçün qiymətlərin daha sabit dinamikasına ehtiyac olduğunu bildirirlər.
Bölmənin digər xəbərləri
