Gürcüstana qanunsuz yolla gətirilən 2 kiloqramdan artıq heksogen maddə aşkarlanıb
Tbilisi, 11 sentyabr, AZƏRTAC
Gürcüstan Dövlət Təhlükəsizlik Xidmətinin (DTX) əməkdaşları külli miqdarda partlayıcını müxtəlif yollarla ölkəyə gətirən iki nəfər Ukrayna vətəndaşını saxlayıb. Onlardan 2,4 kiloqram heksogen maddə götürülüb.
AZƏRTAC xəbər verir ki, bu barədə Gürcüstan DTX-si məlumat yayıb.
Bildirilib ki, sentyabrın 10-da Ukrayna dövlət nömrə nişanlı yük maşını Türkiyədən Sarp keçid məntəqəsi vasitəsilə Gürcüstana gəlib. Həmin avtomobil bundan əvvəl Rumıniya və Bolqarıstanda olub. Avtomobildə gizlədilən 2,4 kiloqram heksogen trotildən qat-qat güclüdür.
İstintaq müəyyən edib ki, Ukraynada naməlum şəxs partlayıcı maddəni avtomobilin sürücüsü olan Ukrayna vətəndaşına təhvil verib. Təhlükəli yük çəlləklərdə gizlədilib. Sürücüyə bildiriblər ki, Gürcüstan sərhədini keçdikdən sonra həmin maddəni başqa şəxs götürməlidir.
DTX Gürcüstan ərazisində həm avtomobilin sürücüsünü, həm də əlaqə saxladığı şəxsi saxlayıb. Axtarışlar zamanı saxlanılan şəxslərin üzərindən 8 ədəd mobil telefon, 1 ədəd kompüter, elektron daşıyıcı, külli miqdarda nağd pul, müxtəlif ölkələrdən SİM kartlar və kokain aşkar edilib.
Faktla bağlı “Partlayıcı maddələrin qanunsuz əldə edilməsi, saxlanması və daşınması” və “Narkotik vasitələrin qanunsuz dövriyyəsi” maddələri ilə təhqiqat aparılır.
AZƏRTAC-ın xüsusi müxbiri
Tbilisi
Bölmənin digər xəbərləri
