Gürcüstanın Poti şəhərində yeni limanın inşasına başlanılıb
Tbilisi, 1 oktyabr, AZƏRTAC
Oktyabrın 1-də Gürcüstanın Qara dəniz sahilində yerləşən Poti şəhərində (Sameqrelo-Zemo Svaneti regionu) yeni limanın inşasına start verilib.
AZƏRTAC xəbər verir ki, yeni terminal il ərzində 2,5 milyon tondan çox yük qəbul edəcək.
Yeni limanın təməlqoyma mərasimində Gürcüstanın İqtisadiyyat və Davamlı İnkişaf naziri Nati Turnava, Regional İnkişaf və İnfrastruktur naziri maya Tskitişvili və digər rəsmi şəxslər iştirak ediblər.
Bildirilib ki, bu ilin may ayında Potidə yeni limanın inşası ilə bağlı OPIC və “Pace Georgia” şirkətləri arasında müqavilə imzalanıb. Ümumi dəyəri 120 milyon ABŞ dolları olan layihənin icrasının birinci mərhələsində 93 milyon dollar xərclənəcək ki, bunun da 50 milyon dollarını OPIC şirkəti ödəyəcək.
Məlumat üçün qeyd edək ki, 25 hektar ərazini əhatə edəcək limanın dərinliyi 13 metr olacaq və obyekt yükgötürmə qabiliyyəti 60 min tona qədər olan gəmiləri qəbul edə biləcək. Limanın yük dövriyyəsinin 5 milyon tona qədər artırılması və burada 500-ə yaxın iş yerinin yaradılması nəzərdə tutulub.
N.Turnava çıxışı zamanı deyib ki, Gürcüstan ərazisindən tranzit yüklərin daşınmasının həcminin artırılması hökumətin prioritetlərindən biridir.
Gürcüstan hökuməti bu istiqamətdə investisiyaların həcmini əhəmiyyətli dərəcədə artırmağı planlaşdırır.
Bildirilib ki, bu limanın tikintisi Böyük İpək yolunun, “Şərq-Qərb” avtomagistralının, dəmir yolunun, o cümlədən Bakı-Tbilisi-Qars dəmir yolunun modernləşdirilməsi üçün geniş imkanlar açacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
