Gürcüstanın qərbində qarda itkin düşənlərin axtarışları davam edir
Tbilisi, 1 mart, AZƏRTAC
Gürcüstanın qərb bölgəsində yağan güclü qarın yaratdığı problemlərin həll olunması istiqamətində işlər aparılır.
AZƏRTAC xəbər verir ki, Quriya və İmereti bölgələrində əhalinin təxliyəsinə və itkin düşənlərin axtarışına helikopterlər cəlb olunub.
Daxili İşlər Nazirliyinin Fövqəladə Halların İdarə Olunması Xidmətinin xilasediciləri, yanğınsöndürənləri və polis qüvvələri qocalar və azyaşlılar da daxil olmaqla daha bir neçə ailəni təhlükəsiz mühitə daşıyıblar. Həmçinin əhali ərzaq məhsulları, dərman vasitələri və ilkin tələbat malları ilə təmin olunur.
İmereti bölgəsində itkin düşənlərin axtarışı isə davam edir. Yerli hakimiyyət orqanlarının məlumatına görə, İmeretinin Xaraqauli rayonunun dağlarında itkin düşən çobanın axtarışları hələ də davam edir. Cümə günündən yağan qar səbəbindən üç çobanla əlaqə saxlanılmayıb, lakin xilasedicilər artıq onlardan ikisinin yerini müəyyən edə biliblər. Çobanların axtarışı xüsusi pilotsuz uçuş aparatları vasitəsilə aparılır.
Qeyd edək ki, güclü qar səbəbindən Gürcüstan Dəmir Yolları bir neçə istiqamətdə reysləri təxirə salıb.
Xətayi Əzizov
AZƏRTAC-ın xüsusi müxbiri
Tbiliisi
Bölmənin digər xəbərləri
