Hazırda ən təhlükəli sürüşmə zonası Lənkəran-Lerik yolundadır
Hazırda ən təhlükəli sürüşmə zonası Lənkəran-Lerik yolunun 17-ci və 19-cu kilometrliyindədir.
Bu barədə Ekologiya və Təbii Sərvətlər Nazirliyinin əməkdaşı Sadiq Əmiraslanov AZƏRTAC-a məlumat verərkən bildirib.
Son sürüşmə hadisəsində antropogen amillərin - insan fəaliyyətinin roluna toxunan mütəxəssis tikinti qaydalarının pozulmasına toxunaraq deyib: “Yol çəkilişində yamac qazılaraq tikinti aparılır. Nəticədə yamacın meyilliyi itir və dayanıqlığı pozulur. Bu da sürüşməyə səbəb olur. Amma sürüşmənin əsas səbəbi yağıntıların miqdarı və torpağın süxurlarını təşkil edən məhsuldur. Bu süxurlar yumşaq və gillidirsə, orada mütləq sürüşmə olacaq.”
Ağsu dolayında, Şamaxının bir neçə kəndində, Lerik zonasında, Quba-Xaçmaz ərazisində və digər ərazilərdə hər il torpaq sürüşmələrinin baş verdiyini bildirən S. Əmiraslanov fəal sürüşmə zonalarında vəziyyətin sabit olduğunu deyib. Diqqətə çatdırıb ki, Bayıl, Badamdar, Masazır və Zığ da sürüşmə zonalarıdır. Ancaq bu ərazilərdə torpaq sürüşməsinin qarşısını almaq üçün dövlət tərəfindən ciddi tədbirlər görülür.
S. Əmiraslanov bildirib ki, nazirlik tərəfindən hər həftə ölkəmizin 51 sürüşmə zonasındakı süxurların vəziyyəti, sürüşmənin aktivləşmə və passivləşmə periodu öyrənilir, növbəti ayda gözlənilən hadisələr haqqında proqnoz hazırlanır. Bundan əlavə, aylıq bülletenlər tərtib olunur, aktlar yazılır və tədbir görülməsi üçün aidiyyəti qurumlara göndərilir.
Bölmənin digər xəbərləri
