Həbəşistanın turizm sahəsinə investisiyanın qoyulmasının mümkünlüyü müzakirə olunmuşdur
Bakı, 3 dekabr (AZƏRTAC). Həbəşistanın eyni zamanda Azərbaycanda akkreditə edilmiş səfiri Mulatu Teşomeni Mədəniyyət və Turizm Nazirliyində olmuşdur.
Mədəniyyət və Turizm Nazirliyinin beynəlxalq əlaqələr və mədəniyyət proqramları şöbəsindən AZƏRTAC-a bildirmişlər ki, nazir Əbülfəs Qarayev ilə görüşdə ölkələrimiz adasında turizm sahəsində əməkdaşlığın perspektivləri və Azərbaycan tərəfindən Həbəşistanın turizm sahəsinə investisiya qoyulmasının mümkünlüyü müzakirə olunmuşdur.
Səfir Mulatu Teşomeni ölkəsinin turizm potensialı haqqında nazir Ə.Qarayevi məlumatlandırmış və bildirmişdir ki, hazırda Həbəşistanda dövlət tabeliyində olan otellərin özəlləşdirilməsi prosesi həyata keçirilir.
Əbülfəs Qarayev tolerant siyasət həyata keçirən bir ölkə kimi Həbəşistanın mədəniyyət və turizm nazirini 2013-cü ilin aprelində Bakıda təşkil olunacaq Ümumdünya Mədəniyyətlərarası Dialoq Forumunun iştirakçıları arasında görmək istədiyini səfirin diqqətinə çatdırmışdır.
Qarşılıqlı maraq doğuran məsələlər ətrafında fikir mübadiləsinin aparıldığı görüşdə səfir Mulatu Teşomen gələcəkdə iki ölkə arasında turizm və mədəniyyət sahələrində əməkdaşlığın genişlənəcəyinə əmin olduğunu bildirmişdir.
Bölmənin digər xəbərləri
