Hədəf STEAM Liseyinin təşkilatçılığı ilə #şagirdinüçünrəqset beynəlxalq həştəqinə uyğun videoçarx hazırlanıb
Bakı, 23 aprel, AZƏRTAC
Hədəf STEAM Liseyinin təşkilatçılığı ilə #şagirdinüçünrəqset (#danceforstudents) beynəlxalq həştəqinə uyğun videoçarx hazırlanıb.
Liseydən AZƏRTAC-a bildirilib ki, layihənin məqsədi koronavirus infeksiyası ilə əlaqədar tətbiq edilən karantin rejimində məktəb və müəllimləri üçün darıxan şagirdləri sevindirməkdir. Videoçarxda Hədəf Liseyində və respublikanın bir sıra məktəblərində çalışan müəllimlərin, eləcə də xarici ölkələrdən olan müəllimlərin rəqsi nümayiş olunur.
Ümumilikdə 25 müəllimin iştirak etdiyi bu videolayihə üçün “Dance monkey” mahnısı seçilib. Videoçarxda gənc tarzən Ayət Baxşıyevin tarla improvizəsi də yer alıb.
Qeyd olunub ki, #şagirdinüçünrəqset həştəqi çərçivəsində hazırlanan videoçarx yalnız telefonla çəkilən kadrlarla ərsəyə gəlib. Layihə iştirakçılarının fikrincə, müəllimlər evdə qalarkən də öz şagirdlərini sevindirə bilər, rəqs etmək isə bunun ən effektiv yoludur.
Bölmənin digər xəbərləri
