Həkimə edilən müraciətin gecikməsi xəstənin həyatını təhlükə qarşısında qoyur
Bakı, 6 noyabr, AZƏRTAC
Ötən ilin axırlarında Çinin Hubey əyalətində başlayan yeni növ koronavirus (COVID-19) infeksiyası bir ilə yaxındır ki, bəşəriyyətə qənim kəsilən ən böyük düşmən olaraq qalır. Onunla aparılan mübarizə bir qədər zəifləyən kimi infeksiyanın yeni dalğası baş qaldırır. Son vaxtlar payız-qış mövsümünün gəlişi ilə əlaqədar respirator xəstəliklərlə yanaşı, COVID-19-a yoluxma sayında da artım müşahidə olunur.
AZƏRTAC xəbər verir ki, Bakıdakı 6 nömrəli poliklinikanın terapiya şöbəsinin müdiri Gülsarə Sadıqova mövcud vəziyyətin kifayət qədər ciddi narahatlıq doğurduğunu bildirib. Onun dediyinə görə, indi daha çox sayıqlıq nümayiş etdirmək, ikiqat məsuliyyətli olmaq zamanıdır: “Tarixi Azərbaycan torpaqları 27 il erməni işğalı altında qaldıqdan sonra Milli Ordu əsgərlərinin fədakarlığı və rəşadəti hesabına azad edilir. Bu gün uşaqdan-böyüyə, azyaşlıdan ixtiyar qocaya qədər hamının fikri savaş cəbhəsinə yönəlib. Bu, başadüşüləndir. Bu günü illərboyu hər birimiz gözləmiş, arzu eləmiş və onun həsrəti ilə alışıb-yanmışıq. Çox-çox şükürlər ki, dualarımız yerdə qalmadı. Hər gün cəbhədən alınan xoş xəbərlər bizi sevindirir, düşmən əsarətindən xilas edilən torpaqlarımız qəlbimizi qürur və iftixar hissi ilə doldurur. Döyüş cəbhəsində əldə edilən uğurlar bizi hədsiz dərəcədə sevindirsə də, arxa cəbhəni də unutmamalıyıq. Bunu heç kəs unutmamalıdır ki, ön cəbhə həmişə arxa cəbhəyə söykənir. Əsgər arxa cəbhədən arxayın olmalıdır ki, onun fikri evdə, ailəsinin yanında qalmasın. O, bilməlidir ki, arxa cəbhədə hər şey qaydasındadır və burda hamı onun hünər və rəşadətini dəstəkləyir. Belə olanda əsgərin fikri yalnız azğın düşməni məhv etməyə, onu tarixi torpaqlarımızdan qovub çıxarmağa yönələcək. Ona görə də biz də burda ayıq-sayıq dayanmalı, koronavirusla mübarizədə qətiyyən arxayınçılıq hissinə yol verməməliyik. Necə ki, ön cəbhədə məğlubiyyətlə barışmayaraq azğın düşmən Qarabağ torpağının qəhrəman müdafiəçilərinə, cəsur əsgərlərimizə zərbə vurmaq üçün fürsət, girəvə gözləyir, eləcə də yeni növ koronavirus infeksiyası da sağlamlığa xətər yetirmək üçün məqam axtarır. Bu məqamı isə ona səhlənkarlıq, ehtiyatsızlıq, arxayınçılıq və sayıqlıq hissinin itirilməsi verir. Biz gigiyenik qaydalara lazımi səviyyədə əməl etməyəndə, qapalı məkanlarda, tünlük olan yerlərdə, dükan-bazarda, nəqliyyat vasitəsində maskadan istifadəni unutduqca, sosial məsafə saxlamadıqca, çox təmasa girdikcə gözəgörünməz düşmənə əlverişli fürsət vermiş oluruq. Sayıqlıq hissinin azaldılması pandemiyaya yoluxmaq təhlükəsini artırır. Üstəlik digər infeksiyalardan fərqli olaraq COVID-19-un təbiəti elədir ki, azacıq bir ehtiyatsızlıqdan da istifadə edir. Məhz buna görə də xüsusən ictimai yerlərdə maskasız hərəkət etmək yolverilməzdir. Maska taxmağı unudan və ya etinasız yanaşana da bunu anlatmaq və vacibliyini başa salmaq lazımdır”.
Həkim-terapevt deyib: “Payız-qış mövsümündə respirator xəstəliklərin artması gözlənilən idi. Təəssüf ki, ölkəmizdə COVID-19-a yoluxanların çoxluğu daha erkən - hələ havaların isti keçdiyi, soyuqlar düşmədiyi vaxtlardan başlanıb. Narahatlıq doğuran hallardan biri də odur ki, bəzən xəstəliyin ilkin əlamətləri ilə üzləşənlər onu gizlətməyə və ya infeksiyaya yoluxmadığı barədə özünü inandırmağa çalışır. Halbuki erkən və vaxtında həkimə və tibb müəssisəsinə müraciət edilməsi daha düzgün olardı. Təəssüf ki, əksər hallarda iş işdən keçəndən, xəstəlik tamam taqətdən salandan sonra həkim qapısına pənah aparanlarla çox rastlaşırıq. Bu, xəstənin sağalacağına gümanı azaltdığı kimi həkimi də çətin vəziyyətdə qoyur. Təcrübə göstərir ki, xəstə virusa yoluxanda 5-7 gün ərzində ilkin əlamətlər özünü göstərir. Əlamətlər büruzə verən kimi yubanmadan sahə həkiminə müraciət edilməlidir. Gecikmə zamanı pnevmoniya ortaya çıxa, tənəffüs çatışmazlığı yarana bilər. Həmin mərhələdə müraciətin gecikməsi xəstənin həyatını təhlükə qarşısında qoyur”.
“Təəssüflə qeyd etmək istəyirəm ki, əksər hallarda maskanın düzgün taxılmaması halları ilə də rastlaşırıq. Əvvəla, peyvəndin tapılmadığı, başqa konkret müalicə vasitələrinin olmadığı bir şəraitdə qaydalara əməl edilməsi, o cümlədən qoruyucu maskanın taxılması yeganə mühafizə vasitəsi olaraq qalır. Bir var sürücünün avtomobil müfəttişinin cərimə yazmamağı üçün kəmər taxmağı, bir də var öz təhlükəsizliyini qorumaq üçün. İntizamlı sürücü bunu öz təhlükəsizliyi naminə etdiyi kimi, sağlamlığı qayğısına qalan vətəndaş da maskanı düşünərəkdən özünü və ətrafdakıları qorumaq üçün taxır. Maska taxarkən çalışmaq lazımdır ki, burunun üzəri də örtülsün, əks halda infeksiya mənbəyi tam bağlanılmamış qalır. Hava-damcı yolu ilə yayılan infeksiyalar zamanı həm udlaq, həm də qırtlaq bağlanılmalıdır ki, virus selikli qişa vasitəsilə orqanizmə daxil olmasın. Əllərin antiseptik vasitələrlə silinməsi, sosial məsafənin qorunmasına da mühüm şərtlərdən biri kimi ciddi şəkildə riayət edilməlidir”, -deyə şöbə müdiri bildirib.
Bölmənin digər xəbərləri
