Hərbi Tibb İdarəsində tədbir: Heydər Əliyev və Azərbaycan Həmkarlar İttifaqları
Bakı, 26 may, AZƏRTAC
Müdafiə Nazirliyi Birləşmiş Həmkarlar İttifaqı Komitəsinin təşkilatçılığı ilə Hərbi Tibb İdarəsində xalqımızın Ümummilli Lideri Heydər Əliyevin anadan olmasının 100 illiyi ilə bağlı tədbir keçirilib.
Nazirliyin Birləşmiş Həmkarlar İttifaqı Komitəsinin sədri Zakir Müslümov, Müdafiə Nazirliyi Tibb Baş İdarəsinin rəisi tibb xidməti general-mayoru Firudin Nəbiyev və qonaqlar əvvəlcə Baş Klinik Hospitalın həyətində Ulu Öndərin xatirəsinə ucaldılmış abidəni ziyarət edərək önünə tər qızılgüllər düzüblər.
AZƏRTAC xəbər verir ki, Tibb Baş İdarəsinin akt zalında reallaşan tədbirdə nazirliyin birlik, birləşmə, idarə və müəssisələrdə çalışan həmkarların sədrləri, hərbçilər və başqa qonaqlar iştirak ediblər.
Tədbirdə Azərbaycan xalqının Ümummilli Lideri Heydər Əliyevin və Vətənimizin ərazi bütövlüyü uğrunda gedən döyüşlərdə canlarını fəda etmiş şəhidlərin xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.
Ulu Öndərin həyatı və siyasi fəaliyyətini əks etdirən qısametrajlı sənədli film nümayiş olunub.
Müstəqil Azərbaycanın qurucusu, görkəmli siyasi və dövlət xadimi Heydər Əliyevin anadan olmasının 100 illiyi ilə əlaqədar Prezident İlham Əliyevin Sərəncamına əsasən ölkəmizdə 2023-cü il “Heydər Əliyev İli” elan olunub. Bu məqsədlə ölkəmizin hər yerində Ulu Öndərin xatirəsinə ehtiram olaraq silsilə tədbirlər keçirilir. Müdafiə Nazirliyinin Tibb Baş İdarəsində keçirilən tədbir də Müdafiə Nazirliyi Birləşmiş Həmkarlar İttifaqı Komitəsinin keçirdiyi silsilə tədbirlərin davamıdır.
Məruzə ilə çıxış edən Müdafiə Nazirliyinin Birləşmiş Həmkarlar İttifaqı Komitəsinin sədri Zakir Müslümov bildirib ki, Ulu Öndər Heydər Əliyevin həm sovet Azərbaycanına, həm də müstəqil Azərbaycan Respublikasına rəhbərliyi dövründə xalqımızın qarşısında əvəzsiz xidmətləri olub. İlk dəfə 1969-cu ildə əvəzolunmaz lider Heydər Əliyev respublikamıza rəhbər təyin olunanda keçmiş sovet respublikaları arasında Azərbaycan ən geridə qalmış respublikalardan biri olub. Ulu Öndər Azərbaycana rəhbər təyin ediləndən sonra kənd təsərrüfatı, sənaye, iqtisadiyyat sahələri sürətli inkişaf mərhələsinə qədəm qoyub.
Zakir Müslümov çıxışına əlavə olaraq qeyd etdi ki, 1992-1993-cü illərdə ölkəmizdə siyasi hakimiyyətin yarıtmaz fəaliyyəti nəticəsində Azərbaycan vətəndaş müharibəsi həddinə çatmışdı. Ölkə bir neçə yerə parçalanmaq üzrə idi. Dövlətçiliyimizin və xalqın bu ağır günündə nicat ancaq Heydər Əliyevə idi və Ulu Öndər hakimiyyətə gələrək Azərbaycanı vətəndaş müharibəsindən və parçalanmaqdan xilas etdi.
Müstəqilliyimizin ilk illərində Respublika Həmkarlar İttifaqı fəaliyyətini dayandırsa da, xalqın təkidli tələbi və xahişi ilə ikinci dəfə hakimiyyətə qayıdan Ulu Öndər Heydər Əliyevin xüsusi diqqət və qayğısı nəticəsində təşkilatımız fəaliyyətini bərpa etdi.
Tibb Baş İdarəsinin rəisi tibb xidməti general-mayoru Firudun Nəbiyev çıxışında Azərbaycan xalqının görkəmli ictimai-siyasi xadimi Heydər Əliyevin dövlətçiliyimizə verdiyi töhfələrdən danışıb. İdarə rəisi Müdafiə Nazirliyində hərbi tibb kadrlarının hazırlanmasında, hərbi tibb müəssisələrinin yaradılmasında müstəsna xidmətləri olduğunu bildirib. Ulu Öndərin ölkəmizə rəhbərliyi dövründə hərbi tibb fakültəsinin yaradıldığını, fakültənin nəzdində feldşerlər məktəbinin və rezidenturanın fəaliyyət göstərdiyini deyib: “Hazırda ordumuzun tibb müəssisələrində xidmət edən tibb işçilərinin əksəriyyəti bu fakültənin məzunlarıdır. Qardaş Türkiyə Respublikasında və başqa xarici ölkələrdə hərbi tibb təhsili almaq üçün hər il gənclər göndərilib. Ordumuzun tibb kadrları ilə təmin olunmasında Ulu Öndərin xidmətləri bununla məhdudlaşmır. Müasir Azərbaycan Ordusu məhz Heydər Əliyevin əvəzsiz xidmətləri sayəsində güclü, qüdrətli bir ordu kimi formalaşmağa başlamışdı. Azərbaycan Prezidenti, Silahlı Qüvvələrin Ali Baş Komandanı Ulu Öndərin siyasi kursunun layiqli davamçısı İlham Əliyev də ordu quruculuğuna xüsusi diqqət ayırmış və ordumuz dövrün tələblərinə cavab verən səviyyəyə yüksəlmişdir”.
Respublika Həmkarları Komitəsinin aparat rəhbəri Şaiq Əhmədov Ulu Öndərin ordu quruculuğuna verdiyi töhfələrdən söz açıb. O, Həmkarlar Komitəsinin şəhid ailələrinə, Qarabağ müharibəsi əlillərinə, müharibə iştirakçılarına verilən yardımlar barədə məlumat verib.
Tədbirdə çıxış edənlər Müdafiə Nazirliyi Məhkəmə Tibbi Ekspertiza və Patoloji Anatomiya Mərkəzinin rəisi tibb xidməti polkovniki Rahim Məmmədov, Müdafiə Nazirliyi Sanitar Epidemioloji Nəzarət Mərkəzinin rəisi tibb xidməti polkovniki Müşviq Hümbətov, ehtiyatda olan polkovnik İsa Qasımov, ilk həmkarlar ittifaqları təşkilatının sədrləri Yaqut Həsənova, Sahib Əsədov, İsabala Gölmətov, Daşdəmir Əliyev və başqaları Azərbaycan xalqının Ümummilli Lideri Heydər Əliyevin dövlətçiliyimizin inkişafı naminə gördüyü işlərdən söz açıblar. Ulu Öndərlə bağlı xatirələrini tədbir iştirakçıları ilə bölüşüblər.
Ulu Öndərin siyasi kursunun davamçısı, dövlətimizin başçısı İlham Əliyev ata vəsiyyətinə əməl edərək işğalda olan torpaqlarımızı azad etməklə Azərbaycanın ərazi bütövlüyünü bərpa edib. Azərbaycan xalqı hər zaman Ulu Öndər Heydər Əliyevin ideyalarını yaşadacaq və xatirəsini böyük ehtiramla yad edəcək.
Bölmənin digər xəbərləri
