HƏŞTƏRXANDA XƏZƏRYANI DÖVLƏTLƏRİN BİRİNCİ HÖKUMƏTLƏRARASI İQTİSADİ KONFRANSI KEÇİRİLƏCƏKDİR
AZƏRTAC-ın xüsusi müxbiri xəbər verir ki, oktyabrın 3-də Həştərxanda Rusiya İqtisadi İnkişaf Nazirliyinin təşəbbüsü və təşkilatçılığı ilə Xəzəryanı dövlətlərin birinci hökumətlərarası iqtisadi konfransı keçiriləcəkdir. Konfransda Xəzəryanı dövlətlərin təkcə rəsmi hökumət nümayəndə heyətləri deyil, iri şirkətlərin təmsilçiləri də iştirak edəcəklər.
Keçirilməsi RF Hökumətinin sədri Vladimir Putinin qərarı ilə təsdiq edilmiş konfransda istehsalat və infrastruktur layihələrinin reallaşdırılması üzrə birgə investisiya istiqamətlərinin yaradılmasını və inkişaf etdirilməsini, habelə dövlətlərarası iqtisadi əməkdaşlığın, neft-qaz-nəqliyyat infrastrukturunun inkişafı, regionun ekoloji təhlükəsizliyinin yaradılması perspektivlərini və bir sıra digər məsələləri müzakirə etmək nəzərdə tutulmuşdur. Bununla yanaşı, Həştərxanda Xəzəryanı Birlik İnstitutunun yaradılması təşəbbüsünü nəzərdən keçirmək də planlaşdırılır. Tədbir çərçivəsində işçi sessiyalardan və iclaslardan başqa, Xəzər regionu ölkələrinin beynəlxalq investisiya layihələri və texnologiyaları sərgisi də təşkil ediləcəkdir.
Bölmənin digər xəbərləri
