MƏDƏNİYYƏT
Həştərxanda Xəzəryanı regionda turizmin inkişafına dair birinci beynəlxalq konfrans keçiriləcəkdir
Bakı, 13 dekabr (AZƏRTAC). Bakı İnformasiya-Turizm Mərkəzindən AZƏRTAC-a xəbər vermişlər ki, “Rusiya Federasiyasında daxili və gəlmələr üçün turizmin inkişafı (2011-2018-ci illər)” federal proqramının həyata keçirilməsi çərçivəsində bu il dekabrın 16-17-də Həştərxanda Xəzəryanı regionda turizmin inkişafına dair birinci beynəlxalq konfrans keçiriləcəkdir. Konfransın təşkilatçıları Rusiya Federasiyasının İdman, Turizm və Gənclər Siyasəti Nazirliyi, Federal Turizm Agentliyi, Həştərxan vilayətinin hökumətidir.
İştirakçılar - Xəzəryanı dövlətlərin (Azərbaycan, İran, Qazaxıstan və Türkmənistanın), Rusiyanın (Moskvanın, Rusiyanın cənub bölgələrinin) işgüzar və siyasi dairələrinin nümayəndələri, BMT-nin ekspertləri turizm sahəsində Xəzəryanı əməkdaşlıq məsələlərini müzakirə edəcəklər.
Konfransın tematik diskussiyalarında Xəzəryanı regionda kruiz turizminin inkişaf etdirilməsi, Xəzəryanı regionun tarixi-mədəni irsinin qorunub saxlanması, Xəzəryanı regionun nüfuzunun yüksəldilməsi məsələlərinin müzakirəsi planlaşdırılır.
Konfransda Azərbaycan Respublikasının mədəniyyət və turizm nazirinin müavini Nazim Səmədov başda olmaqla nazirliyin nümayəndə heyəti iştirak edəcəkdir. Nümayəndə heyətinin tərkibinə Bakı İnformasiya-Turizm Mərkəzinin direktoru Zakir Əliyev, nazirliyin sektor müdiri Mahir Qəhrəmanov, “Geo trave” turizm firmasının baş direktoru İlkin Yetirmişli daxildirlər.