Prezident İlham Əliyev oktyabrın 4-də Şirvan şəhərində ulu öndərin adını daşıyan parkla tanış olmuşdur.

Bu park şəhər sakinlərinin ən sevimli istirahət guşələrindən biridir. Buradakı oturacaqlar yeniləşdirilmiş, müasir işıqlandırma sistemi quraşdırılmışdır. Fəvvarələr, şəlalə isə parka xüsusi gözəllik verir. Bir sözlə, burada Şirvan sakinlərinin asudə vaxtlarını səmərəli keçirməsi üçün yaxşı şərait yaradılmışdır.

Prezident İlham Əliyev və xanımı Mehriban Əliyeva parkda şəhərin bir qrup təhsil işçisi ilə görüşdülər.

Şəhər 21 nömrəli orta məktəbin müəllimi SƏADƏT QULİYEVA dövlətimizin başçısına müraciətlə dedi:

-Cənab Prezident, bizim şəhərimizə xoş gəlmisiniz. İlham müəllim, çox gözəl təsadüfdür ki, bu gün, bizim bu gözəl günümüzdə gəlmisiniz. Biz Müəllimlər gününü qeyd etməyə hazırlaşırıq, sevincimizin həddi-hüdudu yoxdur. Bax, belə gözəl gündə Siz bizə yeni hədiyyə etdiniz. Mehriban xanım, sizi də görməyimizə çox şadıq.

Bizim bu şəhərdə aparılmış abadlıq işlərini öz gözünüzlə gördünüz.

İLHAM ƏLİYEV: Çox gözəl işlər görülür.

SƏADƏT QULİYEVA: Biz bütün bunlara görə həmişə Sizə minnətdarıq. Bu işlər respublikanın bütün yerlərində görülür. Hamı bütün rayonlar haqqında gözəl sözlər deyir. Amma hamısı Sizin adınızla bağlıdır.

Son vaxtlar şəhərimizin nailiyyətləri çoxdur. Ona görə ki, bu il təhsil üzrə göstəricilərimiz yüksəkdir. Bu il 23 nəfər şagird 600-dən yuxarı, Nurlan adlı oğlan isə 700 bal toplayıbdır. Üç nəfər də Prezidentin fərdi təqaüdünə layiq görülmüşdür.

Biz bununla çox fəxr edirik. İnanırıq ki, gələcəkdə şəhərimiz daha da gözəlləşəcəkdir. Bu parkı da ulu öndərin adına layiq saxlamağa çalışırıq. Həmişə Sizin görüşlərinizi televiziyada, hər yerdə izləyirik. Fəxr edirik ki, bizim Prezidentimiz xanımı ilə birlikdə adımızı bütün dünyada ucaldır. Sizinlə doğrudan da fəxr edirik.

ƏZİZƏ MƏMMƏDOVA (Şəhər Qadınlar Şurasının sədri): Sevincimin həddi-hüdudu yoxdur. Çünki bu, mənim ən gözəl günümdür. Təsadüfə baxın, Siz məni “Tərəqqi” medalı ilə təltif etdiniz. Ömrüm boyu Sizə minnətdaram.

İLHAM ƏLİYEV:Təbrik edirəm.

ƏZİZƏ MƏMMƏDOVA: Çox sağ olun. Sabah Müəllimlər günüdür, təntənəli şəkildə qeyd edəcəyik. Yüz yaşayın. Sizi Ulu Tanrı özü qorusun. Əgər Ulu Tanrı Sizi bu yüksək təbəqəyə layiq görürsə, biz ömrümüz boyu minnətdar olacağıq və Sizi həmişə dəstəkləyirik.

ALMAZ MAHMUDOVA (müəllimə): Bizim maaşlarımızı artırmısınız. Sizə buna görə minnətdarıq. Siz həmişə müəllimlərin qayğısına qalmısınız.

İLHAM ƏLİYEV: Mən sizi təbrik edirəm. Müəllim uşaqların tərbiyə olunmasında əsas rol oynayır. Ona görə indi Azərbaycanda təhsil məsələlərinə çox böyük diqqət göstərilir. Həm yeni məktəblər tikilir, həm də müəllimlərin sosial vəziyyəti yaxşılaşır. İndi yeni imzalanmış Sərəncamda bir neçə müəllimin fəaliyyəti qiymətləndirilibdir. Həm medal, həm də fəxri adlar verilibdir. Bu, lazımdır. Təhsil bizim gələcəyimizin, uğurlu gələcəyimizin əsasıdır. Təhsildən çox şey asılıdır. Həm bilik, həm savad, həm də tərbiyə. Uşaqlar həm bilikli, həm savadlı olmalıdır, həm də vətənpərvərlik ruhunda tərbiyə almalıdırlar. Yəni bütün bunlar məktəb illərində həll olunur və müəllimlərdən çox şey asılıdır. Azərbaycanda müəllimlərin sayı çoxdur və onların sosial vəziyyəti ildən-ilə yaxşılaşmalıdır.

Bütün məktəblər təmir olunacaqdır. Son illər ərzində 1500 yeni məktəb tikilib, yüzlərlə məktəb əsaslı təmir olunubdur. Növbəti illərdə bu, davam etdiriləcəkdir. Hələ elə məktəblər var ki, onlar yararsız vəziyyətdə, qəza vəziyyətindədir. İndi xüsusi proqram icra olunur. Bütün rayon və şəhərləri, o cümlədən Şirvanı da nəzərdə tutur. Hesab edirəm ki, növbəti 3-4 il ərzində Azərbaycanda yararsız vəziyyətdə məktəb qalmayacaqdır. İndi bütün məktəblərdə yaxşı avadanlıq quraşdırılır, kompyuter sinifləri yaradılır ki, bizim uşaqlarımız gənc yaşlarından bütün qabaqcıl texnologiyalara hazır olsunlar. Bu, onların gələcək fəaliyyəti üçün çox vacibdir.

Şirvan şəhərinin də inkişafı göz qabağındadır.

ƏZİZƏ MƏMMƏDOVA: Bəli, təzə ad, inkişaf, tərəqqi, gözəllik.

SƏADƏT QULİYEVA: Çox sağ olun ki, bu adı bizim şəhərimizə verdiniz. Doğrudan da biz bununla fəxr etdik.

İLHAM ƏLİYEV: Mən o vaxt belə təşəbbüs irəli sürdüm ki, şəhərin adı dəyişməlidir. Çünki şəhərin özünəməxsus bir adı olmalıdır. Əvvəlki ad bir növ uyğun deyildi. Süni şəkildə yaradılmışdı. Düzdür, insanlar ona öyrəşmişdilər. Ancaq bəziləri heç bilmirdi ki, bu nə deməkdir, kiminlə bağlıdır. Amma, eyni zamanda, mən icra hakimiyyətinin başçısına dedim ki, bütün fəallarla məsləhətləşin, sizin üçün hansı ad daha uyğundursa, biz onun üstündə dayanaq. Hələ mən istəyirdim ki, burada yaşayan insanlar bu qərarı versinlər. Bu ad - Şirvan doğrudan da tarixi addır. Azərbaycanın böyük bir hissəsi Şirvan bölgəsi hesab olunur.

SƏADƏT QULİYEVA: Həm də üzərimizə böyük məsuliyyət qoyur.

İLHAM ƏLİYEV: Əlbəttə, Şirvan zonasında müxtəlif şəhərlər, qədim şəhərlər yerləşir. Ona görə bu şəhərə Şirvan adının verilməsi həm də böyük məsuliyyətdir, şərəfdir. Bu, çox gözəl addır, Azərbaycanın tarixinin böyük bir parçasıdır. Tariximizin böyük bir hissəsi Şirvanla bağlıdır.

ƏZİZƏ MƏMMƏDOVA: Hörmətli Prezident, bu diqqətə, qayğıya görə çox sağ olun. Bir gözəl keyfiyyəti də demək istəyirəm ki, Siz tədrisə necə böyük qiymət verirsiniz. Azərbaycandan kənarda 4 mindən çox tələbənin oxuması balaca iş deyildir. Onlar bizim xəzinəmizdir. Ən zəngin xəzinədir. Onlar təhsili qurtarıb gələndən sonra, inşallah, Azərbaycan dünyaya meydan oxuyacaq. Allah Sizə cansağlığı versin. O gözəl günləri hamımız bir yerdə görək.

İLHAM ƏLİYEV: Əslində, bir yenilik yoxdur. Çünki bu ənənəni vaxtilə

Heydər Əliyev qoymuşdur.

ƏZİZƏ MƏMMƏDOVA: Bəli, ilk dəfə ulu öndər qoymuşdur.

İLHAM ƏLİYEV: Hər il 800-900 tələbə Moskva, Leninqrad, Kiyev və SSRİ-nin başqa aparıcı şəhərlərinə imtahansız göndərilirdi. Yəni imtahanları Bakıda verirdilər, oxumağa oraya gedirdilər. İndi onların bir çoxu Azərbaycanda, müxtəlif yerlərdə işləyirlər. Yəni, biz bu ənənəni, elə bil ki, bərpa edirik və bu, başlanıbdır.

SƏADƏT QULİYEVA: Bu, ulu öndərin qoyduğu ənənədir. Biz bunu bilirik.

İLHAM ƏLİYEV: Ancaq, bununla bərabər, mən hesab edirəm, növbəti mərhələdə Azərbaycanın daxilində təhsilin keyfiyyəti elə olmalıdır ki, biz uşaqları xaricə göndərməyək. Yəqin biz növbəti mərhələdə daha çox xaricdən bilikli, tanınmış müəllimləri dəvət edəcəyik ki, onlar bizim ali məktəblərdə dərs desinlər və müxtəlif seminarlar keçsinlər. Buna ehtiyac var. Bizə bilikli mütəxəssislər lazımdır. Ancaq, yenə də deyirəm, əsas vəzifə odur ki, Azərbaycanda təhsilin səviyyəsi yüksək olsun.

SƏADƏT QULİYEVA: Bəli, hər şey özümüzdə olmalıdır.

Mən qadınların qurultayında idim. Mehriban xanım çox gözəl çıxış etdi, yəni hər sahəyə toxundu. Biz birinci xanımımızla həqiqi mənada fəxr edirik. Təhsilə böyük önəm verir. Gözəl, xeyirxah işlərlə məşğuldur. Mehriban xanım, uşaqdan tutmuş böyüyə kimi hamı sizi sevir. Biz sizinlə fəxr edirik.

FİRƏNGİZ ŞİRƏLİYEVA: Mehriban xanım, builki birinci sinif uşaqlarının hamısına çanta və içərisində lazım olan ləvazimatlar paylamısınız.

İLHAM ƏLİYEV: Hamıya çatdımı?!

FİRƏNGİZ ŞİRƏLİYEVA: Bəli, hamıya çatdı. Bütün valideynlər minnətdardır. Mənim nəvəm bu il birinci sinfə gedir, bu sevinci bütün ailəmiz yaşayıbdır. Siz Azərbaycanda nə qədər ailənin sevincinə səbəb olursunuz. Çox sağ olun.

X X X

Prezident İlham Əliyev və xanımı Mehriban Əliyeva təhsil işçiləri ilə xatirə şəkli çəkdirdilər.

Bununla da dövlətimizin başçısının Füzuli, Beyləqan, Ağdam rayonlarına və Şirvan şəhərinə səfəri başa çatdı.

######