Husilər Aİ ilə “konstruktiv” danışıqlar aparıldığını bildiriblər
Bakı, 22 fevral, AZƏRTAC
Qırmızı dənizdə ticarət gəmilərinə hücumları davam etdirən Yəməndəki husi qiyamçıları bəyan ediblər ki, onların nümayəndəsi Norveçin vasitəçiliyi ilə Avropa İttifaqının (Aİ) rəsmiləri ilə “konstruktiv” danışıqlar aparıb.
AZƏRTAC Anadolu Agentliyinə istinadla xəbər verir ki, husilərin sözçüsünün Səna şəhərində keçirilən mətbuat konfransında bildirdiyinə görə, üç ölkənin - İsrail, ABŞ və Britaniyanın gəmiləri Qırmızı dənizdən keçə bilməyəcək. Qalan bütün ölkələrin bayraqları altında üzən tankerlər və yük gəmilərinin keçidi sərbəstdir.
Husilərin rəhbərlərindən biri olan Hüseyn əl-Əzzi bildirib ki, Qırmızı dənizdən artıq 283 gəmi təhlükəsiz şəkildə keçərək Süveyş kanalına doğru istiqamət götürüb. “Lakin ABŞ, İsrail və Britaniya gəmilərinin keçməsinə izn verməyəcəyik. Birləşmiş Ştatlar Yəmənə aviasiya və raket hücumu edərək gəmilərin təhlükəsizliyini təmin edəcəyini düşünürdü. Amma indi o, köməksiz vəziyyətdədir”, -deyə husilərin nümayəndəsi qeyd edib.
Husilərin bu bəyanatı ilə bağlı ABŞ və Aİ-dən heç bir açıqlama verilməyib.
Bölmənin digər xəbərləri
