İctimai Ekoloji Şuranın üzvləri ilə ekoloji problemlərə dair fikir mübadiləsi aparılıb
Bakı, 30 may, AZƏRTAC
Mayın 30-da ekologiya və təbii sərvətlər naziri Muxtar Babayev İctimai Ekoloji Şuranın üzvləri ilə görüşüb.
Nazirliyin mətbuat xidmətindən AZƏRTAC-a bildiriblər ki, şuranın üzvləri və fəaliyyəti ilə tanışlıq xarakteri daşıyan görüşdə perspektiv fəaliyyət istiqamətləri, ekoloji problemlərin həllində vətəndaş cəmiyyətinin rolu barədə ətraflı fikir mübadiləsi aparılıb və təkliflər dinlənilib.
Görüşdə M.Babayev həlli vacib olan ekoloji problemlərin aradan qaldırılmasında effektivliyin təmin olunması məqsədilə şura tərəfindən təkliflərin hazırlanmasına önəm verildiyini və onun ictimaiyyətlə əlaqələndirici rolunun vacibliyini bildirib. O, şuranın iclaslarının bundan sonra da vətəndaş cəmiyyətinin bütün nümayəndələrinə açıq olmasını, istənilən məsələlərin ictimai müzakirəsinin təşkili üçün lazımi şəraitin yaradılmasını və bu cür görüşlərin mütəmadi keçirilməsini tövsiyə edib.
İctimai Ekoloji Şuranın üzvləri nazirliyin fəaliyyətinin bütün sahələrində yaxından iştirak edəcəklərini bildirib və bir sıra aktual məsələlərə dair təkliflərini səsləndiriblər.
Bölmənin digər xəbərləri
