“İKİ SAHİL” QƏZETİ NEFTÇİLƏR GÜNÜNƏ HƏSR OLUNMUŞ XÜSUSİ BURAXILIŞ HAZIRLAMIŞDIR
AZƏRTAC xəbər verir ki, 20 sentyabr - Neftçilər günündə işıq üzü görən 48 səhifəlik xüsusi buraxılış Azərbaycan neft sənayesinin 1994-cü ildən bəri keçdiyi şanlı yolu əks etdirən maraqlı yazıları, rəngli şəkilləri və yüksək poliqrafik tərtibatı ilə diqqəti cəlb edir.
Ulu öndərimiz Heydər Əliyevin böyük səyləri ilə 1994-cü il sentyabrın 20-də Xəzər dənizinin Azərbaycana aid hissəsində yerləşən “Azəri-Çıraq-Günəşli” yataqlarının neft-qaz sərvətlərinin birgə işlənməsinə dair nüfuzlu xarici şirkətlərlə Azərbaycan Respublikası Dövlət Neft Şirkəti arasında “Əsrin müqaviləsi” adını almış sazişlər imzalanması, bunun nəticəsi olaraq ölkəmizin neft sənayesinin, bütövlükdə iqtisadiyyatının yüksək səviyyəyə qaldırılması Xüsusi buraxılışda verilən yazıların ana xəttini təşkil edir.
Xüsusi buraxılış ulu öndər Heydər Əliyevin “Neftçilər günü”nün təsis edilməsi haqqında 2001-ci il 16 avqust tarixli Fərmanı və Prezident İlham Əliyevin neft sənayesi işçilərinin təltif edilməsi haqqında Sərəncamı ilə başlanır. Prezident Fərmanı Azərbaycan neft sənayesinin çoxəsrlik tarixinə işıq salaraq, 14 il əvvəl imzalanmış beynəlxalq neft sazişlərinin iqtisadiyyatımızın dinamik inkişafında müstəsna rol oynadığını diqqətə çatdırır. Xüsusi olaraq qeyd edilir ki, həmin tarixdən başlayaraq görülən işlər bugünkü və gələcək nəsillərə xidmət edir. Azərbaycan tarixində, onun iqtisadiyyatının inkişafında, xüsusilə dövlət müstəqilliyinin möhkəmləndirilməsində neft sənayesinin əhəmiyyətini nəzərə alaraq hər il 20 sentyabrın Neftçilər günü kimi qeyd edilməsi nefçilərin əməyinə verilən yüksək qiymətdir.
“Azərbaycan neftçiləri hər il olduğu kimi, 2008-ci ildə də peşə bayramlarını böyük əmək qələbələri ilə qarşılayırlar. Onlar ötən ildən XXI əsrin ən mükəmməl texniki layihəsi sayılan Bakı-Tbilisi-Ceyhan əsas ixrac boru kəmərini uğurla istismar edirlər. … Xəyallar həqiqətə çevrilmişdir”. - Bu sözlər Azərbaycan Respublikası Dövlət Neft Şirkətinin prezidenti Rövnəq Abdullayevin Azərbaycanın neft sənayesi işçilərinə bayram təbrikindəndir. ARDNŞ rəhbəri bildirir ki, şirkətimiz inkişaf etdikcə respublikamızın sosial-iqtisadi həyatında daha fəal iştirak edir. Ölkəmizin iqtisadi inkişafına mühüm töhfələr verən neftçilərimiz bu uğurların davamlı olması üçün səylərini əsirgəmir, daha böyük əzmlə çalışırlar. Təbrikdə belə bir əminlik də ifadə olunur ki, ölkəmizin rəhbərliyinin şirkəti modern, çevik, beynəlxalq səviyyəli bir quruma çevirmək barədə qarşıya qoyduğu tapşırıq şərəflə icra ediləcək, ulu öndərimizin neft strategiyası çərçivəsində yeni-yeni uğurlar qazanmaq üçün var qüvvələri ilə çalışacaqlar.
Ümumiyyətlə, “İki sahil” qəzetinin 20 sentyabr - Neftçilər günü münasibətilə hazırladığı xüsusi buraxılış Azərbaycan Respublikası Dövlət Neft Şirkəti strukturlarının fəaliyyəti, onların əlamətdar günə - neftçilərin peşə bayramına hansı nailiyyətlərlə gəldiyi və qarşıda hansı vəzifələrin dayandığı barədə dolğun təəssürat yaradır. Şirkətin birinci vitse-prezidenti Xoşbəxt Yusifzadənin, sosial məsələlər üzrə vitse-prezident Qorxmaz Hüseynovun, iqtisadi məsələlər üzrə vitse-prezident Süleyman Qasımovun, ARDNŞ-in emal üzrə vitse-prezidenti David Məmmədovun, sərmayələr və marketinq üzrə vitse-prezident Elşad Nəsirovun, şirkətin vitse-prezidenti Mikayıl İsmayılovun, “Azneft” İstehsalat Birliyinin baş direktoru Səbuhi Əhmədovun, ayrı-ayrı sahələrə məsul rəhbərlərin yazılarında əldə olunmuş böyük uğurlar diqqətə çatdırılır.
Neft sənayesinin əldə etdiyi uğurlar neftçilərin, bütövlükdə Azərbaycan xalqının daha yaxşı yaşamasına, ölkədə sosial-iqtisadi problemlərin həll olunmasına əsaslı təsir göstərir. ARDNŞ Sosial İnkişaf İdarəsinin rəisi Bədəl Bədəlovun yazısı bu sahədə əldə olunan uğurlara, neftçilərin sosial-məişət problemlərinin həllinə həsr olunmuşdur.
Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin sədri Cahangir Əliyevin hesabat xarakterli yazıları da xüsusi buraxılışda maraqla oxunan materiallardandır.
Bölmənin digər xəbərləri
