İL-76 TƏYYARƏSİNİN YÜKÜ YOLVERİLƏN NORMADAN ARTIQ OLMAMIŞDIR
“Azərbaycan Hava Yolları” Dövlət Konserninin mətbuat xidmətindən AZƏRTAC-a bildirmişlər ki, ilkin məlumatlara əsasən, müəyyən olunmuşdur ki, təyyarə Binə hava limanında yanacaqla doldurulmuş və 7 nəfərdən ibarət ekipaj tərəfindən uçuşa hazırlanmışdır. Mövcud olan sənədlərə görə, təyyarədəki yük inşaat materiallarından ibarət idi və onun çəkisi bu növ hava gəmisi üçün yolverilən normadan artıq deyildir.
Təyyarə havaya qalxdıqdan sonra sola əyilmiş və uçuş-enmə zolağından 600 metr məsafədə yerə dəyərək parçalanmış, yanğın baş vermişdir.
Hava limanının qəza xilasetmə xidmətinin xüsusi bölmələri və yanğınsöndürmə dəstəsi dərhal hadisə yerinə gəlmişlər. Onların dəqiq və ahəngdar işi nəticəsində yanğının yayılmasının qarşısı alınmış və heyət üzvlərindən dörd nəfəri xilas edilərək, 3 nömrəli klinik xəstəxanaya çatdırılmışdır. 3 nəfər isə aldıqları zədələrdən həlak olmuşlar. Dövlət Konserni mütəxəssislərinin gördükləri tədbirlər nəticəsində hava limanına ziyanvurulma təhlükəsinin qarşısı alınmış və o, adi rejimdə işini davam etdirmişdir.
Mətbuat xidmətinin məlumatında deyilir ki, qəzanın nəticələrinin araşdırılması üçün MDB-nin Dövlətlərarası Aviasiya Komitəsinin nümayəndələrinin sədrliyi ilə komissiya yaradılmış, Dövlət Konserninin, Ukraynanın aviasiya orqanlarının mütəxəssisləri, təyyarənin sahibi, İL-76 təyyarələrinin konstruktorları və istehsalçıları komissiyaya cəlb edilmişdir.
Baş vermiş aviasiya qəzası ilə əlaqədar Azərbaycan Respublikası Cinayət Məcəlləsinin 262.3-cü maddəsi ilə cinayət işi açılmışdır.
