Bakı, 27 oktyabr, AZƏRTAC

2003-cü il oktyabrın 15-də Azərbaycan xalqı öz gələcəyini İlham Əliyevə etibar edərək onu Prezident seçəndə həm də Ulu Öndər Heydər Əliyevin xalqa müraciətini dəstəkləyirdi. Ulu Öndər prezident seçkiləri ərəfəsində demişdi: “İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.

Ötən 20 ilin sosial-siyasi, hərbi-iqtisadi, elmi-mədəni yüksəlişini göz önünə gətirəndə, Azərbaycan Respublikasının dünya dövlətləri cərgəsində indiki mövqeyini görəndə bu sözlərin nə qədər uzaqgörənliklə söylənildiyinə bir daha əmin oluruq.

Bu sözləri AZƏRTAC-a müsahibəsində Bakı Dövlət Universitetinin İnformasiya və sənəd menecmenti fakültəsi Redaksiya-nəşriyyat işi kafedrasının müdiri, dosent, Birinci Qarabağ müharibəsi veteranı Knyaz Aslan söyləyib. O deyib: “Azərbaycan xalqı o vaxt öz tarixi seçimini düzgün müəyyənləşdirdiyi üçün bu gün ölkəmiz haqlı olaraq beynəlxalq aləmdə sabitlik və inkişafın qibtəolunacaq ünvanına, ərazi bütövlüyünü və suverenliyini bərpa edən ilk dövlət kimi mübarizlik simvoluna çevrilib”.

İctimai-siyasi və sosial-iqtisadi yüksəliş

Knyaz Aslan qeyd edib ki, hələ 20 il əvvəl dünyada baş verən geosiyasi tendensiyaları aydın görən, bölgədə maraqları olan yaxın və uzaq hegemon ölkələrin Cənubi Qafqazla bağlı məkrli planlarını dərindən anlayan Prezident İlham Əliyev Azərbaycan Respublikasının strateji istiqamətini düzgün müəyyənləşdirməklə müstəqil dövlətimizi və milli dövlətçiliyimizi qətiyyətlə qorumağı bacardı. Dövlət başçısı güclü iqtisadiyyat yaratmaqla, müasir silahlarla təchiz olunmuş peşəkar və nizamlı ordu qurmaqla, beynəlxalq müstəvidə həyata keçirdiyi layihələrlə zaman-zaman regionun liderinə və qlobal siyasətin söz sahibinə çevrilə bildi, Azərbaycanın dünya miqyasında öz layiqli yerini tutmasına nail oldu.

Prezident İlham Əliyevin təşəbbüsü ilə Azərbaycanda siyasi, iqtisadi, sosial islahatların ardıcıl həyata keçirilməsi, regionların inkişafı üzrə dövlət proqramlarının icra edilməsi, paytaxt Bakı ilə ölkənin digər regionları arasında infrastrukturun inkişafındakı disbalansın aradan qaldırılması ən mühüm prioritetlərə çevrildi. Bu baxımdan dövlət başçısının neft sektorundan gələn gəlirlərin qeyri-neft sektorunun inkişafına istiqamətlənməsini nəzərdə tutan neft və qaz gəlirlərinin idarə olunması üzrə uzunmüddətli strategiyanın təsdiqləməsi əhəmiyyətli rol oynadı.

Sonrakı illərdə Azərbaycanda 2 milyondan çox iş yeri açıldı, yüzlərlə yeni sənaye sahələri yaradıldı, kənd təsərrüfatının vaxtilə bərbad vəziyyətə düşmüş ənənəvi sahələri bərpa edildi, yoxsulluq demək olar ki, aradan qaldırıldı, əhalinin həssas qrupları üçün çoxsəviyyəli sosial dəstək sistemi tətbiq edildi.

Azərbaycanda digər sahələrlə yanaşı, təhsilin inkişafına göstərilən diqqət ayrıca vurğulanmalıdır. Ötən illərdə Bakıda və bölgələrdə 3 mindən çox məktəb və digər mühüm sosial infrastruktur obyektləri tikilib istifadəyə verilib ki, bu, Azərbaycan dinamik inkişaf edən iqtisadiyyata malik ölkə olduğunu əyani şəkildə təsdiqləyir.

Prezidentin və ölkənin beynəlxalq imici

BDU-nun kafedra müdiri vurğulayıb ki, Azərbaycanda iqtisadi göstəricilərin artımı həm daxili siyasi sabitliyi möhkəmləndirdi, həm də ölkənin beynəlxalq nüfuzunu gücləndirdi. Təbii ki, dövlətin iqtisadi dayanıqlığı Azərbaycanın beynəlxalq münasibətlərdə strategiyasının müəyyənedici xüsusiyyətinə çevrildi.

Ölkəmizdə ictimai-siyasi sabitliyin qorunub saxlanması və milli təhlükəsizliyin möhkəmləndirilməsi, iqtisadiyyatın keyfiyyətcə yüksəlişi Azərbaycanın beynəlxalq arenada böyük uğurlar qazanması üçün yaşıl işıq yandırdı. Prezident İlham Əliyevin rəhbərliyi ilə Bakı - Tbilisi - Ceyhan, Bakı - Tbilisi - Ərzurum kimi irimiqyaslı əsas ixrac boru kəmərlərinin istifadəyə verilməsi mühüm nailiyyətlər sırasına həkk olundu və ölkəmizin beynəlxalq imicini xeyli yüksəltdi.

Azərbaycan qitənin ən iddialı layihələrindən birini - “Cənub Qaz Dəhlizi”ni reallaşdırmaqla faktiki olaraq Avropanın enerji xəritəsini yenidən cızmağı bacardı. Bir sıra xarici mütəxəssislər bu layihənin tikilib işə salınmasının qeyri-mümkün olacağını proqnozlaşdırsalar da, Azərbaycan bunun əksini sübut edərək qlobal bazarlarda öz mövqeyini xeyli möhkəmləndirdi.

Prezident İlham Əliyevin rəhbərliyi ilə Azərbaycan öz xarici siyasət mövqelərini möhkəmləndirə bildi. Bircə fakt: 2011-ci ildə Azərbaycan 155 səslə BMT Təhlükəsizlik Şurasının qeyri-daimi üzvü seçildi, iki il ərzində dünyanın aparıcı dövlətləri ilə bərabərhüquqlu əsaslarla üzərinə düşən vəzifələri uğurla yerinə yetirdi. Bu hadisə ölkəmizin və onun rəhbərinin dünya miqyasında nüfuzunun artmasının ən mühüm təsdiqi oldu.

Prezident İlham Əliyevin sayəsində 2019-cu ildə isə Azərbaycan yekdilliklə dünyada ikinci ən böyük qlobal strukturun - Qoşulmama Hərəkatının sədri seçildi. Azərbaycanın Qoşulmama Hərəkatının dirçəlişindəki rolu yüksək qiymətləndirildiyinə görə təşkilat ölkəmizin sədrlik müddətini daha bir il uzatdı.

Prezident İlham Əliyevin idarəçilik keyfiyyətləri və liderlik xüsusiyyətləri bir çox ölkələrin başçıları tərəfindən örnək kimi qarşılandı.

Xalq, dövlət, bayraq sevgisi

Azərbaycan Respublikasının Prezidenti İlham Əliyev 2011-ci il iyulun 5-də Bakıda keçirilmiş Dünya azərbaycanlılarının III qurultayındakı nitqində deyirdi: “İqtisadi cəhətdən indi Ermənistan ilə Azərbaycan müqayisə edilə bilməz. Bu tam başqa, necə deyərlər, çəki dərəcələridir. Siyasi proseslərə təsir imkanları baxımından da Azərbaycan daha əlverişli mövqedədir. Çünki həm coğrafi baxımdan, həm gördüyümüz işlər, infrastruktur, enerji siyasəti, bölgədə təhlükəsizlik tədbirlərinin gücləndirilməsi və Azərbaycanın rolu, əlbəttə ki, siyasi cəhətdən də çəkimizi daha da artırır. Mən şübhə etmirəm ki, bütün bu amillər, üstəgəl Azərbaycan Ordusunun güclənməsi nəticəsində biz Dağlıq Qarabağ münaqişəsini həll edə biləcəyik. Azərbaycanın ərazi bütövlüyü bərpa edilməlidir və bərpa ediləcəkdir”.

Bəli, o gün yetişdi!.. Prezident İlham Əliyevin rəhbərliyi, şanlı Ordumuzun gücü ilə otuzillik erməni işğalına son qoyuldu, 2020-ci ilin Vətən müharibəsi zamanı Azərbaycan tarixi ərazisi olan Qarabağ bölgəsinə nəzarəti bərpa edə bildi.

2020-ci il noyabrın 8-də Azərbaycan Prezidenti, Müzəffər Ali Baş Komandan İlham Əliyev Şəhidlər xiyabanından xalqa müraciətində Şuşa şəhərinin işğaldan azad olunduğunu elan etdi.

2021-ci il iyunun 15-də Azərbaycan Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan tarixi bir sənədi - müttəfiqlik münasibətləri haqqında Şuşa Bəyannaməsini imzaladılar.

2023-cü il oktyabrın 15-də - prezidentliyinin 20-ci ilinin tamam olduğu bir gündə Ali Baş Komandan İlham Əliyev Azərbaycan Respublikasının Dövlət Bayrağını Xankəndi şəhərində dalğalandırdı. Azərbaycan tarixinə qızıl hərflərlə yazılan bu fakt həm də milli dövlətçilik tarixində Sovet İttifaqının dağılmasından sonra ərazi bütövlüyümüzün bərpası, Qələbəmizin tam təmin və rəsmi təsdiq olunması kimi yaddaşımıza həkk edildi.

Ali Baş Komandan İlham Əliyev Xankəndidəki çıxışında xüsusi vurğuladı ki, bu gün burada olmağımızın əsas səbəbkarı Azərbaycan xalqıdır, Azərbaycan övladıdır: “Elə bir gənc nəsil yetişdirdik ki, Vətən, torpaq uğrunda ölümə getməyə hazır idi və ölümə də gedirdi. Allah bütün şəhidlərimizə rəhmət eləsin. Biz onların ruhu qarşısında baş əyirik. Biz Azərbaycan xalqı olaraq onlara əbədi borcluyuq. Həm üç il bundan əvvəl, həm son üç il ərzində, həm də sentyabr ayında keçirilmiş antiterror əməliyyatı zamanı Azərbaycan əsgəri, zabiti əsl qəhrəmanlıq, vətənpərvərlik, fədakarlıq göstərmişdir. Biz Ordumuzla, Silahlı Qüvvələrimizlə fəxr edirik, onlar bizim qürur mənbəyimizdir. Təkcə Azərbaycan vətəndaşları yox, əminəm ki, dünyada yaşayan on milyonlarla azərbaycanlı Azərbaycan əsgəri və zabiti ilə, Azərbaycan dövləti ilə haqlı olaraq fəxr edir”.

Prezident İlham Əliyev son otuz ildə azərbaycanlıların bir neçə-neçə nəslin faciəsinə səbəb olan Qarabağ problemini hərbi və diplomatik yolla həll etməyə nail oldu. İndi həyatda yaşayan, bu şanlı günlərin şahidi olan keçmiş qaçqın və köçkünlər, onların övladları və nəvələri işğaldan azad edilmiş doğma torpaqlara qayıdırlar. İndi Qarabağ və Şərqi Zəngəzur yenidən doğulur, dəyişir, dirçəlir, xarabalıqlardan cənnətə çevrilir.

Ulu Öndər Heydər Əliyevin 100 illik yubileyinin qeyd olunduğu bir zamanda Prezident İlham Əliyevin siyasi və hərbi fəaliyyətinin ən möhtəşəm uğuru Azərbaycan Silahlı Qüvvələrinə qətiyyətli və məqsədyönlü rəhbərliyi nəticəsində Qarabağı işğalçılardan təmizləməsi, respublikamızın ərazi bütövlüyünü bərpa etməsi, Azərbaycan dövlətinin qüdrətini bütün dünyaya göstərməsi, cəmiyyətin milli ləyaqətini yeni keyfiyyət mərhələsinə qaldırması, ölkənin və xalqın nüfuzunu yüksəltməsi ilə bağlıdır.

Dahi şair Nizami Gəncəvi hələ XII əsrdə yazırdı ki, hökmdarın ədaləti, yürütdüyü düzgün daxili və xarici siyasət xarabalığa çevrilmiş dünyanı yenidən abadlığa döndərər:

Əgər sən şahsansa, şahlıq mülkünü abad et,

Əgər gövhərsənsə, ilahi tacını abad et.

Bu baxımdan ata nəsihətini əsl oğul ləyaqəti ilə yerinə yetirən Prezident İlham Əliyev çağdaş Azərbaycanın tarixinə öz adını hər zaman parlayacaq qızıl hərflərlə həkk etməyi bacardı: geniş dünyagörüşünə, hərtərəfli biliyə, yüksək mədəniyyətə, əvəzsiz idarəçilik qabiliyyətinə malik inamlı ölkə rəhbəri, dünya miqyasında şəksiz qəbul olunan səriştəli siyasətçi, döyüşkən, əzmkar, rəşadətli Silahlı Qüvvələr yaradan Ali Baş Komandan kimi!..”.