İlqar Orucov: Ölkəmizdə təhsilə qayğı və diqqət ən ali səviyyədədir
Bakı, 15 sentyabr, AZƏRTAC
2023-2024-cü tədris ilindən böyük gözləntilərim var. Prezident İlham Əliyev və Birinci vitse-prezident Mehriban Əliyevanın təhsilə qayğısı və diqqətindən irəli gələrək Azərbaycan təhsili inkişaf edir. Təhsildə islahatlar artıq öz bəhrəsini verməkdədir. Cari tədris ilində də bu islahatların davamını gözləyirik. Görülən işlər, qarşıya qoyulan məqsədlər, hədəflər naminə həyata keçirilən ardıcıl, davamlı işlər öz bəhrəsini mütləq göstərəcək.
Bu fikirləri AZƏRTAC-a açıqlamasında Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucov deyib. O bildirib ki, Azərbaycanda təhsilin prioritet olaraq irəli çəkilməsi ölkəmizin davamlı inkişafına gətirib çıxaracaq. Ötən tədris ilində təhsillə bağlı qəbul olunan qərarlar əslində məhz həmin illə bağlı deyil, növbəti illərdə reallaşacaq uğurların açarı olacaq. Ötən il Prezident Elm və Təhsil Nazirliyinin Əsasnaməsini təsdiq etdi. Nazirliyin tabeliyində üç struktur vahidi yaradıldı. Həmin qurumların növbəti tədris ilində təhsil naminə görəcəyi konkret işlərin şahidi olacağıq. Artıq elm və təhsil naziri yeni tədris ilinin başlanması ilə bağlı əmr imzalayıb.
İlqar Orucov “Heydər Əliyev İli” çərçivəsində yeni tədris ilində ilk dərslərin Ulu Öndərə, onun Azərbaycanın xilaskarı və qurucusu olması mövzusuna həsr olunacağını vurğulayıb: “Ulu Öndər Azərbaycanın təhsilinə hər zaman diqqət göstərib. Ümummilli Lideri Azərbaycan təhsilinin qurucusu da adlandıra bilərik. Çünki Ulu Öndər hakimiyyətdə olduğu bütün dönəmlərdə Azərbaycan təhsilinin inkişafı naminə öz qayğısını və diqqətini əsirgəməyib. Yeni nəsil Ümummilli Lider Heydər Əliyevin Azərbaycan dövlətinin qurucusu, dövlətin xilaskarı kimi tarixi missiyasını öyrənməlidir. Bu, gənclərin vətənpərvərlik və dövlətçilik ruhunda tərbiyə olunması üçün çox önəmlidir. Həmçinin nazirin yeni dərs ilində imzaladığı əmrdə Azərbaycan dövlət dilinin tədrisinə nəzarətin gücləndirilməsi öz əksini tapıb. Dövlət dilimizin tədrisinə qayğı və diqqət, Azərbaycan dilinin şagirdlər tərəfindən mənimsənilməsi, dövlət dilinin tədrisinə nəzarətin gücləndirilməsi mühüm əhəmiyyət kəsb edir. Azərbaycanda təhsilin bütün sahələri inkişaf edir və növbəti ildə də biz o sahələrə qayğını və diqqəti görəcəyik. Müəllimlərin sosial müdafiəsinin gücləndirilməsi istiqamətində dövlətimiz tərəfindən mühüm tədbirlər həyata keçirilir. Əminəm ki, növbəti illərdə də biz bu qayğını görəcəyik. Ötən tədris ilində müəllimlərin sertifikasiyasında uğur qazanan müəllimlərin təhsili irəli aparacağını düşünürəm. Təhsilin keyfiyyətinə təsir edən başlıca faktorlardan biri həm də savadlı müəllimlərlə bağlıdır. 2023-2024-cü tədris ilində ilk dəfə məktəbə müəllim vəzifəsinə qəbul olunmuş gənclərin məhz təhsilə töhfələrini görəcəyik.
“Yeni tədris ili artıq Böyük Qayıdışa dair I Dövlət Proqramı çərçivəsində işğaldan azad olunmuş ərazilərdə yeni məktəb infrastrukturunun istifadəyə verilməsi ilə başlayır. İşğaldan azad olunmuş ərazilərdə bütün infrastruktur baxımından yeni məktəb binalarının açılışlarını görəcəyik, minlərlə şagird məhz öz doğma yurd-yuvalarında məktəbə gedəcək.
Ali və orta ixtisas təhsili müəssisələrində keyfiyyətli təhsil naminə ölkəmizdə həyata keçirilən işləri xüsusi vurğulamaq istəyirəm. Peşə təhsilinin inkişafı istiqamətində Azərbaycanda son illərdə görülən işlər və həyata keçirilən proqramlar növbəti tədris ilində də davam etdiriləcək. Məktəbəqədər təhsilin əhatə dairəsinin genişlənməsinin növbəti tədris ilində də davamı olacağını düşünürəm.
Təhsilin məzmun və keyfiyyət baxımından yenilənməsi üçün yeni dərsliklərin ərsəyə gəlməsi istiqamətində görülən işlər növbəti tədris ilində də davam edəcək. Təhsildə həyata keçirilən islahatlar Azərbaycanın gələcəyinə hədəflənmiş islahatlardır. Təhsildə uğurların əldə olunması hər bir dövlətin dayanıqlı və davamlı inkişafını təmin edir. Ölkəmizdə təhsilə qayğı və diqqət ən ali səviyyədədir”, - deyə İlqar Orucov fikrini yekunlaşdırıb.
Bölmənin digər xəbərləri
