İNDİYƏDƏK TARLALARDAN 19,7 MİN TON PAMBIQ YIĞILMIŞDIR
Bakı, 27 oktyabr (AZƏRTAC). Azərbaycanda pambıq yığımı davam edir.
Kənd Təsərrüfatı Nazirliyindən verilən məlumata görə, indiyədək tarlalardan 19,7 min ton pambıq yığılmışdır. Ən çox məhsul verən rayonların siyahısına Saatlı rayonu (6,2 min ton) başçılıq edir. Sabirabad və Ağcabədi rayonlarında da yığım digər rayonlara nisbətən yüksəkdir. Bir neçə gündür ki, kombaynla məhsul yığımına başlanmışdır.
Yığılmış məhsulu tez və itkisiz emal müəssisələrinə göndərmək üçün ölkəmizdə ən böyük pambıq tədarükçüsü olan “MKT İstehsalat Kommersiya” Şirkəti ABŞ istehsalı olan 20 ədəd pambıqyığan kombayn alaraq işə cəlb etmişdir. Ən müasir tələblərə cavab verən bu texnikanın üstünlüyü istənilən şəraitdə pambıq toplamaq imkanlarına malik olmasıdır.
Bu il 21,1 min hektar sahədən 40 min tonadək pambığın yığılması proqnozlaşdırılsa da, havaların pambıqçılıq üçün əlverişsiz keçməsi bu rəqəmin 30 minə düşməsinə səbəb olmuşdur.
Xatırladaq ki, ötən il ölkəmizdə 48,2 min hektar sahədən 55,4 min ton pambıq yığılmışdır.
Bölmənin digər xəbərləri
