İngiltərədə duman səbəbindən bəzi hava limanlarında uçuşlar ləğv edilib və gecikib
London, 17 dekabr, AZƏRTAC
Paytaxt London ətrafında və Sauthemptonda müşahidə olunan sıx duman minlərlə sərnişinə çətinlik yaradıb.
AZƏRTAC “The Independent”ə istinadla xəbər verir ki, xüsusilə London Siti hava limanında uçuşların ləğvi, gecikməsi və marşrutların dəyişdirilməsi qeydə alınıb. Məlumata görə, Londonun Doklands bölgəsində yerləşən London Siti hava limanında həyata keçirilən azı yeddi uçuş ləğv edilib. Ən çox təsirə məruz qalanlar isə Amsterdam istiqamətində səyahət edən KLM sərnişinləri olub. Niderlanddan günün ilk reysi vaxtında havaya qalxsa da, Şimal dənizi üzərində təxminən 30 dəqiqə dövrə vurduqdan sonra pilotlar təyyarəni təyinat nöqtəsindən 28 mil aralıda yerləşən Sautend hava limanına yönəltmək qərarı veriblər.
Eyni zamanda, Sauthempton hava limanına enməli olan bir sıra təyyarə reysləri də duman səbəbindən ciddi gecikmələrlə üzləşib. Aviasiya rəsmiləri sərnişinlərə hava şəraiti ilə bağlı uçuş cədvəllərində dəyişikliklərin mümkün olduğunu nəzərə almağı tövsiyə ediblər.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
