INSEE: Fransa əhalisinin 15 faizdən çoxu yoxsulluq həddindən aşağı səviyyədə yaşayır
Paris, 8 iyul, AZƏRTAC
Fransada yoxsulluq səviyyəsi rekord həddə çatıb və təxminən 10 milyon insana təsir edir.
AZƏRTAC xəbər verir ki, bu məlumatı Statistika və İqtisadi Təhlil Milli İnstitutu (İNSEE) açıqlayıb.
Azaldılmış yardım və hər zaman inflyasiyaya uyğun gəlməyən maaşlar bu vəziyyətə səbəb olan amillərdəndir. Fransızların həyat səviyyəsi ilə bağlı bu araşdırmada statistik göstəricilər diqqəti cəlb edir. Belə ki, Fransada yoxsulluq səviyyəsi statistika institutunun hesablamağa başladığı 1996-cı ildən bəri heç vaxt bu qədər yüksək olmayıb.
Fransada əhalinin 15 faizdən çoxu yoxsulluq həddindən aşağı səviyyədə yaşayır, yəni ayda 1288 avro alır. 2023-cü ildə bu, əsasən işsiz, eyni zamanda uşaqlar da daxil olmaqla, tək valideynli ailələrdən ibarət 10 milyona yaxın fransızı əhatə edirdi. Bu artım COVID-19-dan sonra yardımın azalması, eləcə də inflyasiya şəraitində maaşların tempi saxlamaması ilə izah olunur.
İNSEE-nin araşdırmaları göstərir ki, yenidən bərabərsizlik kəskin artıb. Ən yoxsul 30 faizin həyat səviyyəsi aşağı düşüb, ən zəngin 10 faizin isə həyat səviyyəsi yüksəlib. Bildirilir ki, bu vəziyyət sosial modelin effektivliyi, yardım və vergi artımları ilə bağlı müzakirələri yenidən alovlandırmaq üçün kifayətdir. Bu kontekstdə hökumət 40 milyard avroya qənaət etmək üçün vergiləri artırmayacağını israr edir.
Bölmənin digər xəbərləri
