İnstitut direktoru: İnsultla mübarizədə Azərbaycanda əhəmiyyətli işlər görülür
Naftalan, 6 oktyabr, E.Məmmədov, AZƏRTAC
Ümumdünya Səhiyyə Təşkilatının məlumatına görə, hər il dünyada 15 milyon insan insult xəstəliyi keçirir. Onlardan 5 milyonu ölür, 5 milyonu əlil olur və xəstələrin demək olar ki, 20 faizi əvvəlki vəziyyətinə qayıda bilir.
Bunu AZƏRTAC-ın bölgə müxbirinə açıqlamasında Naftalanda keçirilən insultun reabilitasiyası və elektrostimulyasiya üzrə I regional təlim zamanı Səhiyyə Nazirliyinin Elmi-Tədqiqat Tibbi Bərpa İnstitutunun direktoru, professor Sədaqət Hüseynova deyib.
O bildirib ki, insultla mübarizədə Azərbaycanda əhəmiyyətli işlər görülür. Xəstəliklə mübarizə üçün Azərbaycanın fizioterapevt və reabilitoloqları Avropa Neyroreabilitasiya Federasiyasının təşkil etdiyi Avstriya, Polşa və Azərbaycan Neyroreabilitasiya proqramına qoşulublar.
“Bu gün Naftalanda keçirilən insultun reabilitasiyası və elektrostimulyasiya üzrə I regional təlimdə Avstriya və Polşa klinikalarında bu sahədə təcrübə keçən həkimlər insult keçirmiş xəstələrin müalicə və reabilitasiyasında olan ən son elmi, praktik məlumatları həkimlərimizə çatdırırlar”, - deyə o əlavə edib.
Bölmənin digər xəbərləri
