İqlim dəyişmələrinə qarşı mübarizədə Azərbaycan lider ölkə kimi qiymətləndirilmişdir
Bakı, 14 fevral (AZƏRTAC). Cari ilin yanvarında ABŞ-ın Yel və Kolumbiya universitetləri tərəfindən hazırlanmış Beynəlxalq ekoloji fəaliyyətin nəticələrinin indeksinə əsasən, iqlim dəyişikliyi bəndi üzrə Azərbaycan son illərdəki fəaliyyətinə görə 1-ci, mövcud vəziyyətə görə isə 67-ci yerdədir.
Ekologiya və Təbii Sərvətlər Nazirliyinin mətbuat xidmətindən AZƏRTAC-a bildirmişlər ki, Azərbaycan BMT-nin iqlim dəyişmələri üzrə çərçivə Konvensiyasının istilik təsiri yaradan qazların tullantılarının azaldılması üzrə kəmiyyət öhdəliyi götürməyən tərəf olsa da, tullantıların azaldılması istiqamətində konkret tədbirlər hesabına, son illər iqtisadiyyatın intensiv inkişafına baxmayaraq, həmin tullantılar 1990-cı baza ilindəki 70 milyon tondan 48 milyon tona enmişdir. Buna ətraf mühitin mühafizəsi və iqlim dəyişmələrinin təsirlərinin yumşaldılması da daxil olmaqla, davamlı inkişaf prinsiplərinə böyük önəm verilməsi nəticəsində nail olunmuşdur. Ümumilikdə, Kioto prosesi başlanandan bəri istilik təsiri yaradan qazların tullantılarının təxminən 500 milyon ton azaldılmasına müvəffəq olunmuşdur. Bu həcm inkişaf etmiş böyük bir Avropa dövlətinin, məsələn, İspaniyanın illik emissiyasına bərabərdir.
Alternativ enerji sektorunun inkişafı prioritet istiqamət kimi seçilmiş, ildə 30 meqavat gücündə günəş panellərinin istehsalı zavodu istifadəyə verilmiş, hibrid enerji layihəsi həyata keçirilmişdir.
Böyük Qafqazın Bazardüzü-Şahdağ-Tufandağ ərazisində iqlim dəyişmələrinin tədqiqi, buradakı buzlaqların iqlim dəyişmələri ilə əlaqədar dinamikasının, həmçinin bu ərazidəki ekosistemin kompleks öyrənilməsi məqsədi ilə Kompleks Hidrometeoroloji və Ekoloji Tədqiqat Elm Mərkəzi yaradılmış, Tufandağın zirvəsində, Şahdağda və Şahdüzündə avtomat meteoroloji stansiyalar quraşdırılmış və enerji tələbatı alternativ enerji hesabına təmin olunmuşdur.
Həyata keçirilən bütün bu tədbirlərin nəticələri reytinqdə nəzərə alınmışdır.
Bölmənin digər xəbərləri
