İqtisadiyyat İnstitutunun alimi ABŞ-da elmi araşdırma aparıb
Bakı, 21avqust, AZƏRTAC
AMEA-nın İqtisadiyyat İnstitutunun Demoqrafiya və işçi qüvvəsinin təkrar istehsalı problemləri şöbəsinin baş elmi işçisi, iqtisad üzrə fəlsəfə doktoru, dosent Rüfət Əfəndiyev Kaliforniya Universitetinin Müqayisəli İmmiqrasiya Tədqiqatları Mərkəzində “Miqrasiya və inteqrasiya problemləri: ABŞ-dakı azərbaycanlıların timsalında” mövzusunda elmi araşdırma aparıb.
İqtisadiyyat İnstitutundan AZƏRTAC-a bildirilib ki, alimin 6 aylıq tədqiqatı azərbaycanlıların xaricə (beynəlxalq) miqrasiyası məsələləri üzrə geniş bir araşdırmasının növbəti mərhələsidir.
Qeyd edək ki, Rüfət Əfəndiyevin Alman Akademik Mübadilə Xidmətinin qrant dəstəyi ilə Berlin Humboldt Universitetinə ilk ezamiyyəti materialların toplanmasına, ədəbiyyat icmalına, faktiki statistika məlumatlarının sosial-demoqrafik, gender təhlilinə və Almaniyada yaşayan azərbaycanlı miqrantlardan müsahibələrin alınmasına həsr olunmuşdu. ABŞ-dakı azərbaycanlı miqrantlarla bağlı vəziyyətin öyrənilməsi isə bu tədqiqatın növbəti vacib tərkib hissəsidir. Keyfiyyət göstəricilərinin tədqiqi - dərin müsahibə (In Depth Interview, IDI) metodundan istifadə edərək, COVID-19 pandemiyası ilə əlaqəli çətin bir vaxtda bu araşdırmada iştirak edən Rüfət Əfəndiyev azərbaycanlı mühacirlərin miqrasiyada əsas motivlərini, istəklərini üzə çıxararaq respondentlərin tədqiq olunan problemə dair fikirlərini və münasibətlərini müəyyənləşdirə və təyin edə bilib.
Xüsusilə qeyd etmək lazımdır ki, əsas hərəkətverici qüvvələr və onların sosial-iqtisadi mahiyyətini başa düşmək baxımından azərbaycanlıların miqrasiya davranışının öyrənilməsi son dərəcə vacib və əhəmiyyətlidir. Tədqiqatın digər mühüm cəhəti azərbaycanlı mühacirlərin ABŞ-a inteqrasiyasının müxtəlif aspektlərinin araşdırılmasıdır.
Elmi tədqiqat təcrübəsi çərçivəsində alim Müqayisəli İmmiqrasiya Tədqiqatları Mərkəzinin təşkil etdiyi bir sıra tematik seminarlarda da iştirak edib.
Rüfət Əfəndiyevin ABŞ-da elmi tədqiqat təcrübəsi “Fulbrayt Alimlər üçün Təqaüd Proqramı”nın (“Fulbright Scholar Program”) maliyyə və təşkilati dəstəyi ilə həyata keçirilib.
Bölmənin digər xəbərləri
