İqtisadiyyat Nazirliyinin şöbə müdiri: “Sənaye 4.0 Hazırlıq Proqramı” pilot mərhələdə müsbət nəticələr göstərib
Bakı, 9 dekabr, AZƏRTAC
Bu gün Azərbaycan qlobal texnoloji meyilləri sadəcə müşahidə etmir, onları tətbiq və inkişaf etdirməkdə qərarlıdır. Dövlətin dəstəyi ilə sənayedə qabaqcıl texnologiyaların tətbiqini sürətləndirmək və müəssisələrin effektivliyini, eləcə də rəqabət imkanlarını artırmaq məqsədilə İqtisadiyyat Nazirliyinin dəstəyi ilə “Sənaye 4.0 Hazırlıq Proqramı”nın icrasına start verilib.
AZƏRTAC xəbər verir ki, bunu İqtisadiyyat Nazirliyinin Rəqəmsal idarəetmə şöbəsinin müdiri Anar Nərimanov “Əqli mülkiyyət və süni intellekt” mövzusunda beynəlxalq konfransda söyləyib. O bildirib ki, proqramın məqsədi şirkətlərin texnoloji və yaşıl transformasiyasını sürətləndirməkdir. Bu çərçivədə müəssisələrin hazırkı vəziyyətinin diaqnostikası aparılır, transformasiya üzrə yol xəritələri hazırlanır və icra mərhələsinə keçid üçün maliyyə dəstəyi – o cümlədən güzəştli kreditlər təqdim olunur. Proqram pilot mərhələ artıq müsbət nəticələr göstərib.
“Bu transformasiyanı daha da sürətləndirmək üçün Sənaye 4.0 Mərkəzi yaradılır. Mərkəz sənaye müəssisələri, texnologiya təchizatçıları, ali təhsil ocaqları və innovasiya ekosistemi arasında əlaqələndirmə funksiyasını yerinə yetirəcək, texnoloji həllərin tətbiqinə və sahə üzrə tədqiqat-inkişaf təşəbbüslərinə praktiki dəstək göstərəcək”, - deyə şöbə müdiri bildirib.
Bölmənin digər xəbərləri
