İran müdafiə qabiliyyəti ilə bağlı Qərblə müzakirələrdən imtina edib
Bakı, 28 iyul, AZƏRTAC
İran bazar ertəsi günü, iyulun 28-də Tehranın raket proqramını və regional təsirini əhatə edən “hərtərəfli razılaşma” planı ilə bağlı Fransanın təklifini rədd edib və bu mövzuda danışıqlara hazır olmadığını bildirib.
AZƏRTAC xarici mətbuata istinadla xəbər verir ki, İran Xarici İşlər Nazirliyinin sözçüsü İsmayıl Bəqayi mətbuat konfransında deyib: “Müdafiə qabiliyyəti ilə bağlı məsələlərə dair heç bir müzakirə olmayacaq”.
Bazar günü Fransanın xarici işlər naziri Jan-Noel Barrot “CBS News” telekanalının “Face The Nation” verilişinə deyib ki, Qərb hökumətləri İranın gizli şəkildə nüvə silahı əldə edə biləcəyi “riskinin” qarşısını almaq üçün Tehranla hərtərəfli razılaşma əldə etməyə çalışır. Amma Tehran bu təklifləri davamlı olaraq rədd edir.
Barrotun açıqlaması cümə günü İstanbulda İran diplomatları ilə Fransa, Almaniya və Britaniyadan olan həmkarları arasında keçirilən görüşdən sonra verilib.
Cümə günü İstanbulda keçirilən danışıqlar E3 kimi tanınan üç Avropa ölkəsinin son həftələrdə BMT-nin İrana qarşı sanksiyalarını bərpa edəcək 2015-ci il nüvə sazişi çərçivəsində sözdə “snapback mexanizmini” işə salmaqla hədələdiyi bir vaxta təsadüf edib.
Bölmənin digər xəbərləri
