İran XİN: ABŞ hələlik sanksiyaların ləğvi ilə bağlı zəmanət verməyib
Bakı, 2 iyun, AZƏRTAC
ABŞ tərəfi hələ ki Tehranın nüvə proqramı ilə bağlı təklif olunan saziş çərçivəsində İrana qarşı sanksiyaların ləğvi üçün zəmanət verməyib.
AZƏRTAC xəbər verir ki, İranın Xarici İşlər Nazirliyinin rəsmi nümayəndəsi İsmail Bəqayi bu barədə mətbuat konfransında deyib.
“Biz İrana qarşı tətbiq edilən sanksiyaların necə aradan qaldırılacağını bilməliyik. Keçmiş təcrübələrin təkrarlanmayacağına, iqtisadi, bank və ticarət sahələrində sanksiyaların aradan qaldırılacağına əmin olmalıyıq”, - deyə diplomat jurnalistlərin müvafiq sualına cavabında bildirib.
Bir müddət öncə Ağ evin mətbuat katibi Karolin Livitt ABŞ Prezidentinin xüsusi elçisi Stiv Uitkoffun Tehranın nüvə proqramı ilə bağlı İran hakimiyyətinə ətraflı və məqbul təklif göndərdiyini bəyan edib.
Xatırladaq ki, İran və ABŞ nümayəndələri mayın 23-də Romada Tehranın nüvə proqramı ilə bağlı danışıqların beşinci raundunu keçiriblər. Danışıqlarda vasitəçi qismində çıxış edən Omanın xarici işlər naziri Bədr əl-Busaidi məsləhətləşmələrdə müəyyən irəliləyişə nail olunduğunu açıqlayıb. Onun iranlı həmkarı isə öz növbəsində bir neçə görüşdən sonra Tehran və Vaşinqtonun müsbət nəticəyə ümid etdiklərini vurğulayıb.
Bölmənin digər xəbərləri
