İraqda parlament seçkilərinin nəticələri məlum olub
Bağdada, 12 oktyabr, AZƏRTAC.
İraqda keçirilən növbədənkənar parlament seçkilərinin ilkin nəticələrinin hesablanmasına görə Müqtəda Əs-Sədrin rəhbərlik etdiyi “Əs-Sədr” hərəkatı önə çıxıb.
AZƏRTAC İraqın Mərkəzi Seçki Komissiyasının (MSK) açıqlamasına istinadla xəbər verir ki, hərəkat 329 yerdən ibarət olan parlamentin 73 yerini qazanıb. İraq parlamentinin sədri Məhəmməd Halbustinin rəhbərlik etdiyi “Təqqədüm” partiyası 38, keçmiş Baş nazir Nuri Əl-Malikinin rəhbərlik etdiyi “Qanuni dövlət” koalisiyası isə üçüncü olaraq seçkilərdə parlamentdəki yerlərin 37-ni əldə edib.
MSK-dan bildiriblər ki, bir sıra seçki məntəqələrində qanun pozuntuları barəsində daxil olan şikayətlər qısa zamanda araşdırılacaq və nəticəsi barədə ictimaiyyətə məlumat veriləcək. Nəzərə çatdırılıb ki, 2003-cü ildən bu yana İraqda keçirilən bütün seçkilərdə əhalinin fəallığı nümayiş olunmayıb. Lakin 2021-ci ilin oktyabrın 10-da keçirilən parlament seçkilərində əhalinin 41 faizdən çoxu fəallıq nümayiş etdirərək seçkilərdə iştirak edib.
Qeyd edək ki, seçkilərdən sonra İraqın yeni parlamenti yeni hökuməti formalaşdırmaq prosesinə başlayacaq.
Rabil Kətanov
AZƏRTAC-ın xüsusi müxbiri
Bağdad
Bölmənin digər xəbərləri
