İraqda qum fırtınası səbəbindən yaralananların sayı 3700-ə çatıb
Bakı, 18 aprel, AZƏRTAC
İraqda bir neçə gündür davam edən qum fırtınası minlərlə insanın sağlamlığında ciddi problemlərə səbəb olub.
AZƏRTAC ölkənin Səhiyyə Nazirliyinə istinadla xəbər verir ki, 3700-dən çox şəxs tənəffüs yolu xəstəlikləri ilə tibb müəssisələrinə yerləşdirilib.
Bağdad xəstəxanalarına 1014 nəfər yerləşdirilib. Xeyli sayda zərərçəkən cənubdakı əl-Mutanna vilayətində də qeydə alınıb, burada 874 nəfərə tibbi yardım göstərilib.
“Bazar ertəsindən etibarən Bağdad və digər vilayətlərdəki xəstəxanalara azı 3747 nəfər yerləşdirilib”, - deyə nazirliyin rəsmisi Səif əl-Bədr məlumat verib.
Onun sözlərinə görə, tibb müəssisələrinə müraciət edənlərin sayı arta bilər. İraq rəsmilərinin verdiyi məlumata əsasən, güclü qum fırtınası səbəbindən Bağdad, Nəcəf və Süleymaniyyə hava limanlarının fəaliyyəti bir neçə saatlıq dayandırılıb.
Bu, son bir ayda İraqda iqlim dəyişiklikləri, bitki örtüyünün deqradasiyası və sürətli səhralaşma səbəbindən baş verən ilk qum fırtınası deyil. Yerli səhiyyə sistemi bu kimi hallara reaksiya verilməsi üçün işlənmiş protokollara malikdir ki, bu da tibbi heyətə zərərçəkənlərə operativ və effektiv yardım göstərməyə imkan verir.
İraq meteoroloqları və səhiyyə işçiləri problemin həll olunmaması təqdirdə güclənən fırtınaların vətəndaşların sağlamlığı və həyatı üçün təhlükəli olduğunu bildirirlər.
Bölmənin digər xəbərləri
